დავით სუბელიანი: შს მინისტრმა მოძრაობის წევრებს შესაძლო დარბევაზე პასუხისმგებლობა აჰკიდა

თეთრი ხმაურის მოძრაობის წევრი დავით სუბელიანი კვირას, რუსთაველის გამზირზე განვითარებულ მოვლენებსა და შს მინისტრ გიორგი გახარიას მისვლასთან დაკავშირებით Facebook-ზე სტატუსს აქვეყნებს.

მოძრაობის წევრს მიაჩნია, რომ არ არსებობდა კონტრაქციის მხარდამჭერების მიერ თხმ-ის აქციის დარბევის საფრთხე. ამის გამო შს მინისტრს აკრიტიკებს და წერს, რომ გიორგი გახარიამ შესაძლო დარბევაზე "პასუხისმგებლობა თეთრი ხმაურის მოძრაობის წევრებს აჰკიდა".

"ბექა (წიქარიშვილი) ფიქრობს, რომ მართლაც დიდი იყო სისხლიანი ღამის რისკი. მე ვფიქრობ, რომ სახელმწიფო ამას არ დაუშვებდა, დაძაბულ ფონზე უფრო ომახიანად ჩავამთავრებდით ჩვენს შეკრებას, რამდენიმე მნიშვნელოვან სიტყვას ვიტყოდით, სადაც ვეცდებოდით შეგვეფასებინა ის თუ რა გააკეთა ეხლა შს მინისტრმა, ან რანაირი ბოდიში მოგვიხადა, ან რა დაპირება მოგვცა მომავალი კვირის...

ჩვენების გულწრფელობაში ერთი წამით არ შემიტანია ეჭვი. მაგრამ, ეხლა, როდესაც გაცილებით მეტი ვიცი, კიდე უფრო კარგად და ნათლად ვხედავ თუ რამდენად რთული ვითარება იყო სიტუაციის ობიექტურად და ადექვატურად შესაფასებლად. ისედაც დაზაფრულებს, მინისტრმაც ბლომად დაუმატა ეს განცდა, აჩქარებდა ჩვენებს, ვეღარ ვაკავებთ, საცაა გაწყდება ჩვენი კორდონი და არიქა ვუშველოთ სიტუაციასო.

სწორედ იმის გამო, რომ ეხლა გაცილებუთ მეტი ვიცი, კიდე უფრო მეტად ვფიქრობ, რომ სისხლისღვრა უდიდესი ალბათობით არ იქნებოდა", - წერს თეთრი ხმაურის მოძრაობის წევრი დავით სუბელიანი.

სუბელიანის მოსაზრებით, მათ კრიზისში შესული პოლიტიკური სიტუაცია ვერ გადაზარდეს  კიდე უფრო დიდ კრიზისში: "სადაც ველოდით მათ მიერ დიდ აღიარებას იმისა რომ მოძალადე, პოლიციური სახელმწიფო გვყავს და ერთადერთ გადაწყვეტილებას - რომ უკანმოუხედავად, თანმიმდევრულად დაიწყებოდა რეფორმების ახალი ტალღა, სადაც ნარკოპოლიტიკა ერთ-ერთი ამბავი იქნებოდა მხოლოდ", - წერს სუბელიანი.

14 მაისს აქციის დასრულების შესახებ გადაწყვეტილება შს მინისტრთან შეხვედრის შემდეგ მიიღეს. მინისტრმა პარლამენტთან შეკრებილებს მიმართა და ბოდიშიც მოუხადა. ამ გადაწყვეტილებას თეთრი ხმაურის მოძრაობისა და აქციის მონაწილეების ნაწილში უკმაყოფილება მოჰყვა.

თბილისში 12-13 მაისს თეთრი ხმაურის მოძრაობამ და ახალგაზრდებმა აქციები მას შემდეგ დაიწყეს, რაც 11 მაისის ღამეს, თბილისის ღამის კლუბებში შსს-მ სპეცოპერაციები ჩაატარა. შედეგად 8 ნარკორეალიზატორი დააკავეს, თუმცა ახალგაზრდებმა სამართალდამცველების მიერ კლუბებში ძალის გადამეტების გამო აქციები იმ ღამესვე გამართეს.

პარალელურად მიმდინარეობდა კონტრაქციაც, რომელსაც მალევე ქართული მარში შეუერთდა. თხმ-ის აქციის დასრულების მიუხედავად, ნეონაცისტური ჯგუფები პარლამენტის ტერიტორიას არ ტოვებდნენ.

ამასთან, მთელი დღის განმავლობაში მათსა და პოლიციას შორის, რომელიც თეთრი ხმაურის აქციას იცავდა, სიტყვიერი და ფიზიკური დაპირისპირება რამდენჯერმე მოხდა - ისინი პოლიციის კორდონის გარღვევას ცდილობდნენ. პოლიციამ 10-მდე ადამიანი წინააღმდეგობის გაწევისთვის დააკავა. თუმცა, პარლამენტთან კონტრაქციისას დაკავებულთა ნაწილი ხელწერილით გაათავისუფლეს.