ვაკის პარკში აქციის მონაწილეებსა და ომბუდსმენს შორის დაპირისპირება მოხდა

ვაკის პარკთან მიმდინარე აქცია ზაზა სარალიძემ დატოვა. აქციის მონაწილეები ნინო ლომჯარიას დაუპირისპირდნენ. მათი აზრით, სახალხო დამცველმა დაარწმუნა სარალიძე, დაეტოვებინა აქცია.

სარალიძემ მედიასთან მხოლოდ ის თქვა, რომ ვაკის პარკიდან არა რუსთაველზე, არამედ სახლში მიდის, თუმცა არ უთქვამს, მოგვიანებით ვაკის პარკში მიმდინარე აქციას შეუერთდება, თუ რუსთაველზე, პარლამენტთან მივა.

თბილისში, ხორავას ქუჩაზე მოკლული ერთ-ერთი მოზარდის მამა ზაზა სარალიძე ვაკის პარკში გამართულ აქციას, რომელშიც პოლიტიკოსები არ მონაწილეობენ, ცოტა ხნის წინ შეუერთდა.

„ნებისმიერ ბერკეტს გამოვიყენებ, რომ სამართლიანობა აღდგეს. ჩემთვის არ აქვს მნიშვნელობა, პოლიტიკოსი დამიდგება გვერდით, თუ ჩემნაირი გლეხი. დღეს ვნახავ, რამდენი ადამიანი მოვა აქ და რამდენს შესტკივა მოკლულ ბავშვებზე გული. ვინც ამბობდა, „შორს პოლიტიკა ამ მოვლენებისგან!“ მოვიდეს და დადგეს აქ“ - მიმართა ხორავას ქუჩაზე მოკლული დავით სარალიძის მამამ, ზაზა სარალიძემ ვაკის პარკში შეკრებილებს.

სარალიძე ბოლო 4 დღეა, აქციებს რუსთაველზე, პარლამენტთან მართავს. გუშინ, გვიან ღამით ცნობილი გახდა, რომ მასთან ერთად აქციის ტრიბუნაზე ოპოზიციური ძალების წარმომადგენლებიც იდგებიან. სწორედ ამას აპროტესტებენ ვაკის პარკში შეკრებილები. მათი აზრით, სამართლიანობის მოთხოვნისას აქციებს პოლიტიკური ელფერი უნდა მოშორდეს. 

ვაკის პარკში აქცია „აღდგეს სამართლიანობა პოლიტიკოსების გარეშე“ ცოტა ხნის წინ დაიწყო. აქცია ხორავას ქუჩაზე მოკლული არასრულწლოვნების ლევან დადუნაშვილისა და დავით სარალიძის ოჯახების სოლიდარობის ნიშნად იმართება.

ზაზა სარალიძემ ვაკის პარკში შეკრებილებს სოლიდარობისთვის მადლობა გადაუხადა. აქციის მონაწილეებმა მას მოუწოდეს, ნუ დაიყენებს პოლიტიკოსებს გვერდით. მათივე თქმით, მიმდინარე აქციის ტრიბუნაზე ნაციონალური მოძრაობის წევრებს არ მიიღებენ.

დღესვე, რუსთაველზე ოპოზიციური პარტიების აქცია 18:00 საათზეა დაგეგმილი. „ნაციონალური მოძრაობამ“ და სხვა ოპოზიციურმა პოლიტიკურმა პარტიებმა განაცხადეს, რომ ისინი გაერთიანებული ძალებით აპირებენ სისტემის წინააღმდეგ ბრძოლას და 18:00 საათზე საინფორმაცია აქცია დაანონსეს, სადაც მომავალ გეგმებზე ისაუბრებენ. 

31 მაისს ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა.  პროკურატურა განაჩენს სააპელაციოში გაასაჩივრებს.  სასამართლო 

31 მაისვე, დღის პირველ ნახევარში, საგანგებო პრესკონფერენცია გამართა მთავარმა პროკურორმაც და ამ საქმეზე პროკურატურის პოზიცია კიდევ ერთხელ განმარტა.  დღის მეორე ნახევარში კი მთავარმა პროკურორმა თანამდებობა დატოვა.

მკვლელობის საქმეზე პარლამენტმა სპეციალური საგამოძიებო კომისია შექმნა.

საგანგებო ბრიფინგი გამართა პრემიერმინისტრმა გიორგი კვირიკაშვილმა, რომელმაც განაცხადა, რომ ხორავას ქუჩაზე მკვლელობის საქმეს შინაგან საქმეთა სამინისტრო დაიბრუნებს გამოძიებაში და მას პირადად გიორგი გახარია უხელმძღვანელებს.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.