პარლამენტთან აქციას როლანდ ახალაია შეუერთდა

პარლამენტის შენობასთან მიმდინარე აქციას როლანდ ახალაია შეუერთდა. მისი თქმით, ის დღეს აქციაზე დგას როგორც რიგითი მოქალაქე.

ახალაიას განცხადებით, იგი პოლიტიკური პარტიის წევრი არასოდეს ყოფილა და ადმინისტრაციულ ორგანოებში მუშაობდა. თუმცა არ გამორიცხავს, რომ ახლო მომავალში "ნაციონალურ მოძრაობაში" ოფიციალურად გაწევრიანდეს.

"2 ახალგაზრდა ბიჭი გამოსალმეს სიცოცხლეს და არავითარი ზომები არ არის მიღებული. ახლა პოლიტიკურ პროცესებზე უნდათ გადაიტანონ აქცენტები. პოლიტიკის გარეშე ცხოვრება არ ხდება და ნურავის ნუ ერიდება რომ პოლიტიკური ხასიათისაა აქცია. უნდა წავიდეს სახლში ეს ბანდიტური ხელისუფლება თავის ბანდიტი ივანიშვილის ხელმძღვანელობით",- განაცხადა როლანდ ახალაიამ.

აქციაზე მურთაზ ზოდელავაც მივიდა. ყოფილი მთავარი პროკურორი ამბობს, რომ ქართველი ხალხის დღევანდელი დაკვეთა "ქართული ოცნების" ხელისუფლების შეცვლაა და ამ მოთხოვნის შესრულებაში მონაწილეობას აპირებს.

"ივანიშვილის სისტემა მისი კაპიტალის დაცვას ემსახურება და არა ჩვეულებრივი ადამიანების ინტერესებს. მთავრობის შეცვლის პროცესი ფორსირებულია, განსაკუთრებით მას შემდეგ რაც "ქართულ ოცნებას" მთავარი პროკურორის მოხსნა მოუწია, შემდგომი ნაბიჯები იქნება იმ მოთხოვნების გაჟღერება, რომ დამატებითი მოთხოვნები დასახელდეს, რათა პროცესი ლოგიკური კალაპოტით წარიმართოს",- განაცხადა მურთაზ ზოდელავამ.

რუსთაველზე ოპოზიციური პარტიების აქცია 18:00 საათზეა დაგეგმილი. „ნაციონალური მოძრაობამ“ და სხვა ოპოზიციურმა პოლიტიკურმა პარტიებმა განაცხადეს, რომ ისინი გაერთიანებული ძალებით აპირებენ სისტემის წინააღმდეგ ბრძოლას და 18:00 საათზე საინფორმაცია აქცია დაანონსეს, სადაც მომავალ გეგმებზე ისაუბრებენ. 

პარალელურად პოლიტიკოსების გარეშე აქცია ვაკის პარკში მიმდინარეობს.

31 მაისს ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა.  პროკურატურა განაჩენს სააპელაციოში გაასაჩივრებს.

31 მაისვე, დღის პირველ ნახევარში, საგანგებო პრესკონფერენცია გამართა მთავარმა პროკურორმაც და ამ საქმეზე პროკურატურის პოზიცია კიდევ ერთხელ განმარტა.  დღის მეორე ნახევარში კი მთავარმა პროკურორმა თანამდებობა დატოვა.

მკვლელობის საქმეზე პარლამენტმა სპეციალური საგამოძიებო კომისია შექმნა.

საგანგებო ბრიფინგი გამართა პრემიერმინისტრმა გიორგი კვირიკაშვილმა, რომელმაც განაცხადა, რომ ხორავას ქუჩაზე მკვლელობის საქმეს შინაგან საქმეთა სამინისტრო დაიბრუნებს გამოძიებაში და მას პირადად გიორგი გახარია უხელმძღვანელებს.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.