პრეზიდენტი: გიორგი კვირიკაშვილი არ იყო წარუმატებელი პრემიერმინისტრი

"ეს მასკარადი უნდა დასრულდეს!" - ასე გამოეხმაურა პრეზიდენტი გიორგი მარგველაშვილი პრემიერმინისტრის თანამდებობიდან გიორგი კვირიკაშვილის გადადგომას.

გიორგი მარგველაშვილმა ეს განცხადება ბათუმის საერთაშორისო კონფერენციაზე გააკეთა და გამოსვლის დიდი ნაწილი, სწორედ სამთავრობო ცლვილებებზე საუბარს დაუთმო. პრეზიდენტმა რამდენჯერმე გაიმეორა, რომ გიორგი კვირიკაშვილი წარუმატებელი პრემიერმინისტრი არ ყოფილა. მან "ქართული ოცნების" თავმჯდომარე ბიძინა ივანიშვილი გააკრიტიკა და განაცხადა, რომ არსებობენ ქვეყნები, სადაც პარტიის პრემიერის თანამდებობას პარტიის თავმჯდომარე იკავებს და ის იღებს პასუხისმგებლობას ქვეყანაში მიმდინარე პროცესებზე.

"პირველ რიგში, მინდა ვთქვა, რომ უმაღლესი თანამდებობის 4 პირთან მიმუშავია. ეს მე-3 პრემიერმინისტრია, რომელიც წავიდა, მაგრამ მიმუშავია 4 უმაღლეს თანამდებობის პირთან - ბატონი ღარიბაშვილი, ბატონი კვირიკაშვილი, ბატონი უსუფაშვილი, ბატონი კობახიძე - მინდა ნათლად ვთქვა, რომ ბატონი გიორგი ყველაზე, ასე ვთქვათ, კომფორტული სამუშაო უმაღლესი თანამდებობის პირი იყო, ნათლად განსაზღვრული და გასაგები ხედვით იმისა, რასაც აკეთებდა და რა მიმართულებითაც ავითარებდა ქვეყანას.

საზოგადოებაში გაჩნდა კითხვები იმასთან დაკავშირებით, რატომ წავიდა ბატონი კვირიკაშვილი თანამდებობიდან. იმიტომ რომ, იმ პროცესში, რომელსაც ჩვენ ვაკვირდებით, ბატონი კვირიკაშვილის გუნდი სწორედ ეკონომიკურ მიმართულებას ავითარებდა. მე ვერ ვიტყვი, რომ საქართველოში ეკონომიკა და მოქალაქეების კეთილდღეობა უმაღლეს დონეზეა, მაგრამ ვერ ვიტყვი, რომ წარუმატებელი იყო ბატონი კვირიკაშვილის საქმიანობა.

ეკონომიკურ პრობლემებზე, დაახლოებით, ერთი თვის წინ პარლამენტში ვისაუბრე, მაგრამ მაშინ სრული მიუღებლობა იყო იმ ჭეშმარიტების, რომ დასაქმების მიმართულებით სირთულეები არსებობს და ასე შემდეგ.

უცებ UNICEF-ის კვლევამ გასაგები გახადა ეს საქართველოს მთავრობისთვის. მე მინდა ვთქვა, რომ ბატონი კვირიკაშვილის გუნდის მიერ ორი წლის განმავლობაში გაკეთებული და ამ მიმართულებით გადადგმული ნაბიჯები ერთმნიშვნელოვნად არ შეიძლება შეფასდეს, როგორც წარუმატებელი და უარყოფითი.

ამავე ფონზე, სრულად გაუგებარია, როდესაც ქვეყანაში მიმდინარე პოლიტიკურ პროცესებზე არ ხდება კომენტირება და, არ ხდება კომენტირება იმ მთავარ პრობლემაზე, რის გამოც საზოგადოება აქტიურად აპროტესტებს ქვეყნის პოლიტიკას, რომელიც ეხება სწორედ მართლმსაჯულების საკითხებს", - განაცხადა გიორგი მარგველაშვილმა.

გიორგი კვირიკაშვილმა გადადგომის შესახებ გუშინ სპეციალურ ბრიფინგზე განაცხადა. მისი თქმით, პარტიის თავმჯდომარეს უნდა მიეცეს შესაძლებლობა, რომ მან გუნდი დააკომპლექტოს.