მარგველაშვილი: ივანიშვილი, როგორც მმართველი პარტიის ლიდერი, პრემიერმინისტრი უნდა გახდეს

პრეზიდენტმა გიორგი მარგველაშვილმა პრემიერმინისტრის თანამდებობიდან გიორგი კვირიკაშვილის წასვლის შესახებ ლაპარაკისას განაცხადა, რომ ქვეყნის ახალი პრემიერი ბიძინა ივანიშვილი უნდა გახდეს, ვინაიდან ის მმართველ პარტიას ხელმძღვანელობს. ამის შესახებ მან ბათუმში მიმდინარე კონფერენციაზე თქვა.

პრეზიდენტის თქმით, უნდა დასრულდეს ის პროცესი, როდესაც მოსახლეობამ, საზოგადოებამ არ იცის, რის გამო "ტოვებენ თანამდებობას წარმატებული პრემიერმინისტრები, ვინ და რატომ ხსნის პრემიერმინისტრებს".

"გუშინ, ბატონი პრემიერი წავიდა თანამდებობიდან და მან თქვა, რომ პარტიის თავმჯდომარეს, ანუ ბიძინა ივანიშვილს უნდა მისცეს შესაძლებლობა დააკომპლექტოს ახალი მთავრობა. მიმაჩნია, რომ ეს პროცესები ბევრად უფრო გასაგები, განჭვრეტადი და გააზრებული უნდა იყოს საზოგადოების მიერ. მიმაჩნია, რომ საზოგადოებისთვის გასაგები უნდა იყოს ვინ, რატომ, უცებ თანამდებობიდან მიდიან პრემიერმინისტრები, რომლებიც არიან წარმატებული პრემიერმინისტრები, ისევე, როგორც წინა პრემიერმინისტრის ბატონი ღარიბაშვილის წასვლის დროს ჩვენ მოვისმინეთ, რომ წარმატებული პრემიერმინისტრია. 

რატომ მიდიან თანამდებობიდან წარმატებული პრემიერმინისტრები, რა არის ამის უკან მდგარი არგუმენტი?! რა პრინციპით და რა კრიტერიუმებით შეირჩევიან ახალი პრემიერმინისტრები?! მიმაჩნია, რომ ეს მასკარადის პერიოდი, როცა უცებ ირჩევიან პრემიერმინისტრები, რა პრინციპით - ეს საზოგადოებისთვის და ჩვენი უცხოელი პარტნიორებისთვის გაუგებარია. ეს უნდა დამთავრდეს.

თუ ევროპულ არჩევანზე და ევროპული სახელმწიფოს ფორმირებაზე ვსაუბრობთ, მარტივად მოგახსენებთ, იქ პრემიერმინისტრები არიან მმართველი პარტიის ლიდერები. შესაბამისად, ბიძინა ივანიშვილი, როგორც მმართველი პარტიის ლიდერი, უნდა გახდეს პრემიერმინისტრი, თუ ჩვენ ვლაპარაკობთ პასუხისმგებლიან პოლიტიკაზე და ისეთი სახელმწიფო პროცესის ფორმირებაზე, რომელიც სახელმწიფოსთვის და საზოგადოებისთვის გასაგებია. თუ ჩვენ ვლაპარაკობთ ისეთი პრემიერმინისტრის დანიშვნაზე და არჩევაზე, რომლის მიმართაც არ გაჩნდება კითხვები. ეს არის რეალობა, რომელშიც ვდგავართ და ასე ფორმირდება ევროპული პოლიტიკური კულტურა. ამას იმიტომ ვამბობ, რომ დღეს ჩვენ საქართველოს ევროპულ გზასთან ვერთიანდებით, ვმსჯელობთ და განვიხილავთ. შესაბამისად, ვფიქრობ, რომ რაღაცნაირად ამ პროცესის დასასრული უნდა იყოს ეს, როდესაც არ ვიცით ვინ, რა პრინციპით ხსნის პრემიერმინისტრებს, რა პრინციპით არჩევს პრემიერმინისტრებს", - განაცხადა პრეზიდენტმა გიორგი მარგველაშვილმა. 

მარგველაშვილმა ყოფილი პრემიერმინისტრის, გიორგი კვირიკაშვილის საქმიანობის შეფასებისას განაცხადა, რომ ის სამუშაოდ ერთ-ერთი კომფორტული მაღალი თანამდებობის პირი იყო და "მისი საქმიანობა არ შეიძლება ცალსახად შეფასდეს წარუმატებლად". 

გიორგი კვირიკაშვილმა გადადგომის შესახებ გუშინ სპეციალურ ბრიფინგზე განაცხადა. მისი თქმით, პარტიის თავმჯდომარეს უნდა მიეცეს შესაძლებლობა, რომ მან გუნდი დააკომპლექტოს.