საგამოცდო ცენტრებში კონდიციონერების მონტაჟი მიმდინარეობს

ერთიანი ეროვნული გამოცდებისთვის საქართველოს მასშტაბით სამ საგამოცდო ცენტრში კონდიციონერების მონტაჟი მიმდინარეობს. 

განათლების მინისტრის მოადგილის, თეიმურაზ მურღულიას თქმით, ამ ეტაპზე ასევე მიმდინარეობს საგამოცდო ცენტრების მობილური კონდიციონერებით უზრუნველყოფა.

„დანარჩენი სკოლები, ვიდრე კონდიციონერები დამონტაჟდება, აღჭურვილია ვენტილატორებით. ეს არ ნიშნავს, რომ კონდიციონერები არ დაიდგმება. კონდიციონერები თურქეთიდან უნდა შემოვიდეს და ამაზე საგარეო საქმეთა სამინისტრო ინტენსიურად მუშაობს. დღეის მდგომარეობით, როგორც ამას საგარეო საქმეთა სამინისტრო და თურქი პარტნიორები გვეუბნებიან, 100 კონდიციონერი უკვე გამოგზავნილია და მინიმუმ 400 რამდენიმე დღეში უნდა შემოვიდეს. პრემიერმა მხოლოდ 3 დღე მოგვცა, რათა ეს ყველაფერი მოგვარდეს. ამასთან, ყველგან არის წყლის დისპენსერები და ყველგან იქნება ვენტილატორები", - განაცხადა მინისტრის მოადგილემ. 

ამ თემაზე დღეს შეფასებისა და გამოცდების ეროვნული ცენტრის ხელმძღვანელმა მაია მიმინოშვილმა სოციალურ ქსელში ჩართვაში ილაპარაკა.

„22 საგამოცდო ცენტრი გვაქვს და ძალიან მიხარია პრემიერის ინიციატივა იმასთან დაკავშირებით, რომ სასწრაფო რეჟიმში უნდა აღიჭურვოს ყველა საგამოცდო ცენტრი გარკვეული სახის გაგრილების სისტემით მაინც და ეს ძალიან ინტენსიურად ხორციელდება. განათლების სამინისტრო ცდილობს და ამას აკეთებს ყველა საგამოცდო ცენტრში,"- თქვა მიმინოშვილმა.

ამასთან, შეფასებისა და გამოცდების ეროვნულმა ცენტრმა გაავრცელა ინფორმაცია, რომ უახლოეს დღეებში (2 დ 3 ივლისს) მოსალოდნელი განსაკუთრებით ცხელი დღეების გამო შეიცვალა ერთიანი ეროვნული გამოცდების (ქართული ენისა და ლიტერატურის გამოცდისა და ზოგადი უნარების გამოცდის) განრიგი.