რისი შეცვლა შეუძლიათ აბიტურიენტებს გამოცდების შედეგების გაგებიდან გასაჩივრებამდე

ერთიანი ეროვნული გამოცდები დასრულდა. ცენტრის ინფორმაციით, ყველა საგნის საგამოცდო ტესტების პირველადი შეფასების შედეგების გამოქვეყნება აგვისტოს პირველ რიცხვებში დაიწყება.

ამ პერიოდში აბიტურიენტები შეძლებენ გაეცნონ თავისი ნაშრომების პირველადი შეფასების სქემას, შეფასების ვარიანტის განხილვას და თუ საჭიროდ ჩათვლიან გასაჩივრების მიზნით, სააპელაციო განაცხადის შევსებას. სააპელაციო პროცესის დაწყების თარიღს შეფასებისა და გამოცდების ცენტრი ვებგვერდზე გამოაქვეყნებს.

ამასთან, ყველა საგნის პირველადი შეფასების შედეგების გამოცხადების შემდეგ, აბიტურიენტებს შეუძლიათ შეცვალონ, წაშალონ, ან დაამატონ სასურველი უნივერსიტეტი, ან ფაკულტეტი. შეფასებისა და გამოცდების ეროვნული ცენტრის ინფორმაციით, ცვლილებების განხორციელება ყველა დაინტერესებულ აბიტურიენტს შეუძლია.

როგორც Imedinews-თან შეფასებისა და გამოცდების ეროვნული ცენტრის ხელმძღვანელის მოადგილემ ივა მინდაძემ განმარტა, აბიტურიენტები ფაკულტეტების და უნივერსიტეტების რაოდენობის არჩევაში არ იზღუდებიან.

მინდაძე აბიტურიენტებს ურჩევს, რომ ჩამონათვალში პირველ რიგში დაწერონ ის სასწავლებელი, სადაც ყველაზე მეტად სურთ სწავლის გაგრძელება. ასევე გაითვალისწინონ ის პრიორიტეტები, რაც უნივერსიტეტის, ან ფაკულტეტის არჩევის დროს მნიშვნელოვანია; ასევე უნივერსიტეტის შერჩევისას საყურადღებოა მისი ადგილმდებარეობა, სწავლის ღირებულება და აბიტურიენტის შესაძლებლობის ფარგლებში მისაღები პირობები.

იმისთვის, რომ აბიტურიენტმა სასწავლებლისა და ფაკულტეტის არჩევაში ცვლილება განახორციელოს, ამისთვის, ის თავისი ელექტრონული ფოსტის მისამართისა და პაროლის მითითებით, უნდა შევიდეს საკუთარ გვერდზე და შეიტანოს სასურველი ცვლილებები. აბიტურიენტი ყველა ცვლილების დადასტურებას მიიღებს ელექტრონული ფოსტის საშუალებით. თუ აბიტურიენტი ელექტრონული ფოსტით ვერ მიიღებს აღნიშნულ დადასტურებას (ვერც „inbox“-ში და ვერც „junk“-ის ან „spam“-ის განყოფილებაში), მას სავარაუდოდ, არ აქვს დასრულებული ცვლილებების განხორციელების პროცედურა (მაგალითად, არ დააჭირა თითი შენახვის ღილაკს). აპელაციების შედეგების გამოქვეყნების შემდეგ აბიტურიენტი პროგრამების პრიორიტეტულ ჩამონათვალს ვეღარ შეცვლის.

რაც შეეხება ქულათა გათანაბრებას, შეფასებისა და გამოცდების ცენტრის ხელმძღვანელის მოადგილე განმარტავს, რომ იმ შემთხვევაში, თუ აბიტურიენტებმა მიიღეს თანაბარი ქულები, ასეთ შემთხვევაში არავითარი მნიშვნელობა არ აქვს, რომელ ადგილზე უწერია აბიტურიენტს სასურველი ფაკულტეტი. უპირატესობა ენიჭება მხოლოდ მაღალ შეფასებას.

როგორც ივა მინდაძე განმარტავს, თუ სასურველ ფაკულტეტზე არის 100 ადგილი და აბიტურიენტია 120, ამ ფაკულტეტზე 100 ადგილს დაიკავებენ ის აბიტურიენტები, რომლებმაც უმაღლესი შეფასება მიიღეს. თუ ისე მოხდა, რომ მე-100 ადგილზე ორმა აბიტურიენტმა მიიღო თანაბარი შეფასება, ასეთ შემთხვევაში უნივერსიტეტი ამატებს ადგილს.

ერთიანი ეროვნული გამოცდები 2 ივლისს დაიწყო და 26 ივლისს, ფიზიკის გამოცდით დასრულდა. საქართველოში სულ 22 საგამოცდო ცენტრი ფუნქციონირებდა.

2 ივლისს განათლების მაშინდელმა მინისტრმა მიხეილ ჩხენკელმა განაცხადა, რომ მომავალი წლიდან შესაძლოა ეროვნული გამოცდები გაზაფხულზე ჩატარდეს.