მეუფე იაკობი ამბობს, რომ დეკანოზ მამალაძის ბრალეულობაზე პატრიარქის აზრი იცის

ბოდბელი ეპისკოპოსი, პატრიარქის ქორეპისკოპოსი მეუფე იაკობი აცხადებს, რომ ილია მეორის აზრით, დეკანოზი გიორგი მამალაძე დამნაშავეა. ამის შესახებ მან ჟურნალისტებთან განაცხადა. ინფორმაციას 1tv ავრცელებს.

მისივე თქმით, საქართველოს ეკლესიის წმინდა სინოდი, სავარაუდოდ, შემოდგომაზე შეიკრიბება და ე.წ. ციანიდის საქმეზეც იმსჯელებს.

„ჩვენ არ ვმალავდით. მე თავიდანვე გითხარით, რომ გვცოდნოდა, არ იყო დამნაშავე, მე ვიქნებოდი პირველი, ვინც ციხიდან გამოიყვანდა. ეს ჩემი პირადი განცხადებაა. პატრიარქზე რაც ვიცი, გითხარით“, – დასძინა ბოდბელმა ეპისკოპოსმა.

კითხვაზე, აპირებს თუ არა მსჯავრდებული დეკანოზის მონახულებას ციხეში, მეუფე იაკობმა აღნიშნა, რომ არ აპირებს.

„ვინც მას ვიცნობთ და ვიცით, რას აკეთებდა, გიორგი მამალაძესთან არ შევალთ. მეუფე გრიგოლს აქვს თავისი აზრი, თუმცა მანაც ჩემთან საუბარში თქვა, რომ გიორგი მამალაძე დამნაშავეა,“ - განაცხადა მეუფე იაკობმა.

ფოთისა და ხობის ეპარქიის წარმომადგენლებმა დეკანოზი გიორგი მამალაძე ციხეში 25 ივლისს მოინახულეს. შეხვედრის შესახებ სპეციალური განცხადებაც გაავრცელეს.

მღვდელმთავრები მიიჩნევენ, რომ საფუძვლიანდა უნდა გადაიხედოს მსჯავრდებული სასულიერო პირის საქმე; ასევე დეკანოზ გიორგი მამალაძეს, საეკლესიო წესების თანახმად, უნდა მიეცეს საშუალება, როგორც სასულიერო პირმა, წმიდა სინოდს პირადად მოახსენოს ყოველივე ის, რის საჯაროდ გაცხადებასაც პრინციპულად დაუშვებლად მიიჩნევს, მიუხედავად დიდი საზოგადოებრივი ინტერესისა.

2017 წლის 5 სექტემბერს, მოსამართლე ბესიკ ბუგიანაშვილმა დეკანოზ გიორგი მამალაძეს 9 წლით თავისუფლების აღკვეთა მიუსაჯა. განაჩენი ორივე მხარემ გაასაჩივრა. პროკურატურა განაჩენის დამძიმებას, დაცვა კი გამამართლებელ განაჩენს ითხოვს. 

გიორგი მამალაძე მკვლელობის მომზადების ბრალდებით თბილისის აეროპორტში 10 თებერვალს დააკავეს. ის ბერლინში მიფრინავდა, სადაც საქართველოს პატრიარქს ოპერაციისთვის ამზადებდნენ.