ანგელა მერკელის მთავარი გზავნილები პრესკონფერენციიდან

რუსეთის პრეზიდენტმა იცის ჩემი პოზიცია ოკუპაციაზე, ეს არის უსამართლობა-ამის შესახებ გერმანიის კანცლემა საქართველოს პრემიერთან ერთობლივ პრესკონფერენციაზე განაცხადა.

ანგელა მერკელის თქმით, ის მხარს უჭერს საქართველოს ოკუპაციასთან ბრძოლაში. „ხვალ მექნება შესაძლებლობა მივიდე ადმინისტრაციულ საზღვართან, სადემარკაციო ხაზთან, მათ შორის იქ, სადაც ევროკავშირის მისიაა წარმოდგენილი. ეს არის უსამართლობა, რაც ხდება. რუსეთის პრეზიდენტმა ჩემი პოზიცია იცის, მათ შორის უკრაინასთან დაკავშირებით. ჩვენ ვსაუბრობთ ამაზე. მე მას ვესაუბრები. ეს ერთი კონტექსტია. მიუხედავად დიდი ძალისხმევისა, ძალიან ცოტა კეთდება, რათა ერთხელ და სამუდამოდ წარსულს ჩაბარდეს ეს დიდი უსამართლობა. ეს არ უნდა გახდეს ყოველდღიურობა. არ უნდა მოხდეს შეგუება ამ სიტუაციასთან. ჩვენ ყოველდღიურად, მაქსიმალურად უნდა ვისაუბროთ ამაზე“, - განაცხადა ანგელა მერკელმა. 

მისივე თქმით, გერმანია მხარს უჭერს საქართველოს ტერიტორიულ მთლიანობას და ამ კონფლიქტის გადასაჭრელად ყველაფერს აკეთებს. 

„მოხარული ვარ, რომ დღეს საქართველოში ვიმყოფები. ბოლოს აქ სტუმრად ზუსტად 10 წლის წინ ვიყავი. მაშინ ხელი მოეწერა ცეცხლის შეწყვეტის შეთანხმებას. მკაფიოდ მოვითხოვე რუსეთის ჯარების გაყვანა და რა თქმა უნდა, 10 წლის შემდეგაც მხარს ვუჭერ საქართველოს ტერიტორიულ მთლიანობას. რაც შეგვიძლია გავაკეთოთ ამ კონფლიქტის გადასაჭრელად, ჩვენს წვლილს შევიტანთ ამაში“, – განაცხადა მერკელმა.

გერმანიის კანცლერის თქმით, მისი ვიზიტის დროს საქართველოში ხელი მოეწერება ორ შეთანხმებას, საქმე ეხება დაახლოებით 199 მილიონი ევროს პროექტებს, რომელიც გამოიყოფა გაზსაცავის, ასევე წყლით მომარაგებისა და კანალიზაციის სისტემებისთვის.

მერკელმა აღნიშნა, რომ ევროკავშირს და საქართველოს აქვთ მჭიდრო ურთიერთობა და რომ გერმანიამ დიდი წვლილი შეიტანა საქართველოსთან ასოცირებისა და თავისუფალ ვაჭრობაზე შეთანხმების ხელმოწერაში, ასევე ვიზალიბერალიზაციის მიმართულებით. მან აღნიშნა, რომ ბერლინი ძალიან კარგად თანამშრომლობს საქართველოსთან ორგანიზებულ დანაშაულთან ბრძოლაში.

„საქართველო უსაფრთხო ქვეყანაა. თავიდან ვიზალიბერალიზაციის ფონზე ძალიან ბევრი თავშესაფრის მაძიებელი ჩამოვიდა საქართველოდან. თუმცა შემდეგ ასეთი პირების რაოდენობა შემცირდა და როგორც პრემიერმინისტრმა მითხრა, ასეთი მათი რაოდენობა კიდევ უფრო შემცირდება“, -  განაცხადა კანცლერმა.

მერკელმა ხაზი გაუსვა ქვეყნებს შორის ორმხრივი ურთიერთობების გაღრმავების მნიშვნელობას და აღნიშნა, რომ ამას თბილისში მისი ვიზიტიც ხელს შეუწყობს. 

გერმანიის კანცლერი საქართველოს დღეს ეწვია.