ნაზი ჯანეზაშვილი: პრეზიდენტმა გამოუსწორებელი შეცდომა დაუშვა

იუსტიციის უმაღლესი საბჭო მოსამართლეთა შესარჩევ კონკურსთან დაკავშირებით დღეს ახალგაზრდა იურისტების რეკომენდაციებზე იმსჯელებს. საბჭოს წევრთა ნაწილი მიიჩნევს, რომ რეკომენდაციების გათვალისწინება მნიშვნელოვანია. საბჭო დღეს ასევე მოსამართლეობის მსურველთა განცხადებებს განიხილავს.

სხდომის დაწყებამდე საბჭოს წევრმა ნაზი ჯანეზაშვილმა უზენაესი სასამართლოს თავმჯდომარის კანდიდატურის დასახელებაზე პრეზიდენტის უარიც შეაფასა. საბჭოს წევრის თქმით, პრეზიდენტმა გამოუსწორებელი შეცდომა დაუშვა, როცა კანდიდატურის დასახელებაზე უარი თქვა.

„პრეზიდენტმა დაუშვა გამოუსწორებელი შეცდომა, მან დაიწყო პროცესი ისე, რომ თითქოს უნდოდა შედეგი ჰქონოდა, მაგრამ ვფიქრობ, რომ მისი კონსულტაციები იყო არასაკმარისი, ან ფორმატი არ ჰქონდა სწორად შერჩეული. მე როგორც ვხედავ, მან არ იცის სასამართლოს შიგნით არსებული პრობლემები და პროცესებს აკვირდება გარედან. მას რომ სცოდნოდა, რომ დღეს სისტემას მართავს მიხეილ ჩინჩალაძე და მისი ხალხი, აი აქ ვინც არიან იუსტიციის უმაღლეს საბჭოში, ვინც მიიღებს უკვე მოგვიანებით გადაწყვეტილებას, პასუხისმგებლობით მოეკიდებოდა უზენაესი სასამართლოს თავმჯდომარის კანდიდატურის შერჩევის პროცესს. როგორც იგი მოიქცა, ამას გაბუტვას დავარქმევდი“, - განაცხადა ნაზი ჯანეზაშვილმა.

აღსანიშნავია, რომ თუ პრეზიდენტი არ შეცვლის გადაწყვეტილებას, ოქტომბერში, ახალი კონსტიტუციის ამოქმედების შემდეგ, სწორედ იუსტიციის საბჭოს მოუწევს უზენაესი სასამართლოს თავმჯდომარეობის კანდიდატის დასახელება.

პრეზიდენტის სასახლეში უზენაესი სასამართლოს თავმჯდომარეობის კანდიდატის შესარჩევად კონსულტაციები 6 აგვისტოს დაიწყო. კონსულტაციებს ჯერ მმართველი გუნდი, ხოლო მოგვიანებით არასამთავრობო სექტორიც გამოეთიშა.

უზენაესი სასამართლოსა და იუსტიციის უმაღლესი საბჭოს თავმჯდომარემ ნინო გვენეტაძემ თანამდებობის დატოვების შესახებ 2 აგვისტოს განაცხადა და ამის მიზეზად ჯანმრთელობის მდგომარეობა დაასახელა.

ნინო გვენეტაძე უზენაესი სასამართლოს თავმჯდომარის პოსტზე საქართველოს პარლამენტმა 2015 წლის 20 მარტს აირჩია. მან ამ პოზიციაზე კოტე კუბლაშვილი შეცვალა. უზენაესი სასამართლოს თავმჯდომარის კანდიდატად გვენეტაძე პრეზიდენტმა გიორგი მარგველაშვილმა შეარჩია და პარლამენტს წარუდგინა.