კვლევა: მასწავლებლების ხელფასი ეკონომიკის ყველა სექტორში არსებულ საშუალო ხელფასს ჩამორჩება

2011-2017 წლებში საჯარო სკოლებში საშუალო ნომინალური ხელფასი, მათ შორის პედაგოგების, ორჯერ გაიზარდა და 2017 წელს 548 ლარი იყო უკვე, თუმცა ქვეყნის ეკონომიკის ყველა სექტორში არსებულ საშუალო ნომინალურ ხელფასს თითქმის ორჯერ ჩამორჩება. ამის შესახებ საერთაშორისო გამჭვირვალობა- საქართველოს კვლევაში წერია, რომლის სახელწოდებაც არის „დაბალი ხარისხის სასკოლო განათლებაში სულ უფრო მეტს ვიხდით“.

კვლევის თანახმად, საჯარო და კერძო სკოლებში მასწავლებლების ხელფასებს შორის დიდი სხვაობა არ არის, ორგანიზაციის ცნობით, ბოლო მონაცემებით კერძო სკოლის მასწავლებელთა საშუალო ხელფასი 631 ლარია. 

კვლევაში წერია, რომ სასკოლო განათლების დაფინანსებასა და ხარისხის ზრდას შორის პირდაპირი კავშირის არარსებობის ერთ_ერთი მთავარი მიზეზი ის არის, რომ არ არსებობს ხარისხის ამაღლებაზე ორიენტირებული სახელმწიფო პოლიტიკა.

ამაკვე კვლევით ცნობილი გახდა, რომ საქართველო სასკოლო განათლების ხარისხით 72 ქვეყანას შორის ბოლოდან მე-11 ადგილზეა, გლობალური კონკურენტუნარიანობის ინდექსით კი 137 ქვეყანას შორის 106-ზე.

კვლევის ცნობით, 2016-2018 წლებში სკოლის გამოსაშვები გამოცდები წარმატებით მოსწავლეთა საშუალოდ 77%-მა ჩააბარა, მაშინ როცა 2011-2015 წლებში წარმატების საშუალო მაჩვენებელი 84% იყო. ყველაზე პრობლემური საგნები კი ფიზიკა, მათემატიკა და უცხო ენაა.