ნარკოტიკული თრობის დასადგენად სპეციალურ ჩასასუნთქ აპარატებს ჩამოიტანენ

გახარიას ჩამოაქვს სპეციალური ჩასასუნთქი აპარატი, რომელიც როგორც ალკოჰოლს ადგენს, ისე ადგენს ნარკოტიკული თრობის თემას, - ამის შესახებ ვიცესპიკერმა გია ვოლსკიმ განაცხადა. ინფორმაციას „ინტერპრესნიუსი“ ავრცელებს.

როგორც გია ვოლსკიმ განმარტა, ახალი ნარკოპოლიტიკა ბიძინა ივანიშვილთან შეთანხმდა.

„ბიძინა ივანიშვილს ავტორიტეტი აქვს და ამ საკითხის გადაწყვეტის დროს რომ არ მიეღო სათანადო განმარტებები და კომენტარები, იგი არ აუნთებდა ამ საკითხს მწვანე შუქს.

საფრთხეები არსებობს, თუმცა გამართული სისტემაა იმისთვის, რომ ეს საფრთხეები განეიტრალდეს. დარწმუნებული ვარ, რომ როგორც კი ამის იმპლიმენტაცია დაიწყება, გაქრება სუნი საზოგადოების თავშეყრის ადგილებში.

გახარიას ჩამოაქვს სპეციალური ჩასასუნთქი აპარატი, რომელიც როგორც ალკოჰოლს ადგენს, ისე ადგენს ნარკოტიკული თრობის თემას. ამასთან საჭიროა, რომ კონფესიებმაც და განათლების სისტემებმაც ჩართონ რესურსი, რათა მარიხუანას დამაზიანებლობაზე მეტი იქადაგონ“, - განაცხადა გია ვოლსკიმ.

11 სექტემბერს, შსს-ში განმარტეს, რომ მთავრობა განიხილავს ექსპორტზე გასატანად სამედიცინო და კოსმეტიკური მიზნით, კანაფის მოყვანა-წარმოების საკითხს. შსს-ს ცნობით, მთავრობის მიერ მარიხუანასთან დაკავშირებით ინიცირებული საკანონმდებლო ცვლილებები ითვალისწინებს მარიხუანის გასაღების მკაცრ შეზღუდვას.

კერძოდ, იმ შემთხვევაშიც კი, თუ საქართველო კანაფის ექსპორტიორი გახდება, მისი გასაღება ქვეყანაში ისევ სისხლის სამართლის დანაშაული იქნება და ამ მიმართულებით შინაგან საქმეთა სამინისტროს მიერ მომზადებული პროექტი მკაცრ შეზღუდვებს აწესებს. განმარტება შინაგან საქმეთა სამინისტროში მას შემდეგ გაკეთდა, რაც ამ ახალმა ამბავმა საზოგადოებაში აზრთა სხვადასხვაობა გამოიწვია. 

30 ივლისს საკონსტიტუციო სასამართლომ პარტია „გირჩის“ წევრების სარჩელი დააკმაყოფილა, რითაც კანაფის მოხმარებისთვის ადმინისტრაციული სასჯელი გააუქმა.

იმავდროულად საკონსტიტუციო სასამართლოს გადაწყვეტილების ფონზე შსს-მ კანაფის მავნე ზეგავლენის წინააღმდეგ ახალი რეგულაციები მოამზადა.