კანაფის მოყვანა-წარმოების შესახებ კანონპროექტის განხილვა გაურკვეველი დროით გადაიდო

სამედიცინო მიზნით კანაფის კულტივაციისა და ექსპორტის შესახებ კანონპროქეტის განხილვა გაურკვეველი დროით გადავადებულია.

მმართველ გუნდს საკითხზე მსჯელობა ახლა პარალმენტს გარეთ გააქვს. იწყება კონსულტაციები სასულიერო პირებთან და ექსპერტებთან. ირაკლი კობახიძე, რომელიც ამ საკითხთან დაკავშირებით უკვე შეხვდა პატრიარქს და მას ხელისუფლების პოზიცია გააცნო, ამბობს, რომ გადაწყვეტილების მიღებისას , ერთ-ერთი განმსაზღვრელი, სწორედ საპატრიარქოს პოზიცია იქნება.

ჯერ- ჯერობით აზრთა სხვადასხვაობაა უმრავლესობაშიც. ამის მიზეზად კი, კანონპროექტის მომხრე დეპუტატები ინფორმაციის ნაკლებობას ასახელებენ. 

სამედიცინო მიზნით კანაფის კულტივაციისა და ექსპორტის საკითხი ის თემა აღმოჩნდა, რომელმაც სამღვდელოება და ოპოზიცია გააერთიანა. კანონპროექტის წინააღმდეგ სასულიერო პირები ამბიონებიდან ქადაგებენ და არც მუქარანარევ განცხადებებს ერიდებიან.

თუმცა მმართველი გუნდი დარწმუნებულია, რომ სრული ინფორმაციის მიღების შემდეგ, მათი პოზიცია შეიცვლება. ხვალიდან კი, პარლამენტი მხოლოდ კანაფის მოხმარების რეგულაციებთან დაკავშირებული კანონპროექტის განხილვას იწყებს. ნატა მახვილაძე განარძობს ახლა თემას პირდაპირ ეთერში.

კანონპროექტი პარლამენტში 14 სექტემბერს დარეგისტრირდა. ახალმა ამბავმა საზოგადოებაში აზრთა სხვადასხვაობა გამოიწვია.

15 სექტემბერს, შინაგან საქმეთა მინისტრის მოადგილემ, ნათია მეზვრიშვილმა ტელეკომპანია „იმედის“ ეთერში მარიხუანის რეგულირებისა და კანაფის მოყვანა-წარმოების შესახებ კანონპროექტებთან დაკავშირებით ისაუბრა.

მისი თქმით, კანაფის შესახებ მითქმა-მოთქმა მოვისმინეთ ადამიანებისგან, რომლებსაც კანონპროექტი არც წაუკითხავთ.

15 სექტემბერს ღამით, საკრებულოსთან სასულიერო პირებმა კანაფთან დაკავშირებული პოლიტიკა გააპროტესტეს.

შსს-ს ცნობით, მთავრობის მიერ მარიხუანასთან დაკავშირებით ინიცირებული საკანონმდებლო ცვლილებები ითვალისწინებს ქვეყანაში მარიხუანის გასაღების მკაცრ შეზღუდვას.

30 ივლისს საკონსტიტუციო სასამართლომ პარტია „გირჩის“ წევრების სარჩელი დააკმაყოფილა, რითაც კანაფის მოხმარებისთვის ადმინისტრაციული სასჯელი გააუქმა.საკონსტიტუციო სასამართლომ კანაფის მოხმარებაზე სისხლის სამართლის პასუხისმგებლობა 2017 წლის 30 ნოემბერს გააუქმა.

იმავდროულად საკონსტიტუციო სასამართლოს გადაწყვეტილების ფონზე შსს-მ კანაფის მავნე ზეგავლენის წინააღმდეგ ახალი რეგულაციები მოამზადა.

ასევე ცნობილია, რომ გარემოს დაცვისა და სოფლის მეურნეობის სამინისტროს დაქვემდებარებაში კანაფის კონტროლის სააგენტო შეიქმნება.