აშშ-ის სახელმწიფო დეპარტამენტი საქართველოს ტერორიზმთან ბრძოლის უნარებს უწონებს

ამერიკის შეერთებული შტატების სახელმწიფო დეპარტამენტმა, ტერორიზმის წინააღმდეგ ბრძოლის კუთხით, მსოფლიოს სხვადასხვა ქვეყანასთან ერთად, საქართველოს მიერ განხორციელებული ღონისძიებებიც შეაფასა. უწყება, ოფიციალურ გვერდზე გამოქვეყნებულ 2017 წლის ანგარიშში, საქართველოს ტერორიზმთან ბრძოლის უნარებს უწონებს და აცხადებს, რომ „საქართველოს მთავრობას ზოგადად შესწევს უნარი გამოავლინოს, შეაკავოს და რეაგირება მოახდინოს ტერორიზმის შემთხვევებზე“.

ანგარიშში განხილულია გასული წლის 21-22 ნოემბერს, ბერი გაბრიელ სალოსის ქუჩაზე, სუს-ის  ხელმძღვანელობით ჩატარებული ოპერაცია.

„ტერორისტთა ჯგუფის ერთი წევრი დააკავეს, ორი მოკლულია, ხოლო მეოთხე ეჭვმიტანილმა მოახდინა თვითლიკვიდაცია, ასაფეთქებელი მოწყობილობის ამოქმედების შედეგად. მოგვიანებით, საქართველოს მთავრობის მიერ მოხდა გარდაცვლილთაგან ერთ-ერთის, საერთაშორისო ტერორისტის აჰმედ ჩატაევის იდენტიფიცირება. ერთი ქართველი ოფიცერი მოკლეს, ხოლო ოთხი დაიჭრა. 26 დეკემბერს, სასამართლოს ნებართვის საფუძველზე, დილით, სუს-ის კონტრტერორისტულმა დეპარტამენტმა განახორციელა კონტრტერორისტული ოპერაცია პანკისის ხეობაში. ჩატაევთან შესაძლო კავშირის გამო, ხელისუფლების მიერ დაკავებულია 4 პირი. ერთი ადამიანი მძიმედ დაიჭრა და მოგვიანებით გარდაიცვალა. 2017 წლის დეკემბრის ბოლოს, გამოძიება ორივე ოპერაციასთან დაკავშირებით მიმდინარეობდა.

ივლისში, საქართველომ დაიწყო გამოძიება და შემდგომი სისხლის სამართლებრივი დევნა საქართველოს მოქალაქის წინააღმდეგ, რომელიც სავარაუდოდ ISIS- ში იბრძოდა“, - ნათქვამია სახელმწიფო დეპარტამენტის ანგარიშში.

ამასთან, დეპარტამენტი მიიჩნევს, რომ „საქართველოს სახელმწიფო უსაფრთხოების სამსახური არის წამყვანი უწყება ტერორიზმთან დაკავშირებულ ინციდენტებზე რეაგირების კუთხით და ზოგადად არის კარგად აღჭურვილი და მომზადებული“. 

ანგარიშში ყურადღება გამახვილებულია საკანონმდებლო ბაზაზეც და ამ მხრივ კანონმდებლობაში შეტნილ ცვლილებებზე.

„2017 წელს, საქართველომ განაგრძო კონტრტერორისტული კანონმდებლობის გაძლიერება. საქართველომ მიიღო კანონმდებლობა ფარული საგამოძიებო მოქმედებების და ელექტრონული თვალთვალის ღონისძიებების გამოყენების რეფორმირებისა და მართვის ზედამხედველობის გაზრდის მიზნით. 2017 წელს, პარლამენტმა მიიღო სხვა ცვლილებები, რომელთა შორის იყო სამართალდამცავი ორგანოებისათვის ელექტრონული კომუნიკაციის მონაცემების თვალთვალის განმახორციელებელი სააგენტოსგან პირდაპირ გამოთხოვის უფლებამოსილების მინიჭება და ასევე, სისხლის სამართლის საქმის მონაწილე პირების უსაფრთხოების დაცვის გაძლიერება. მთავრობამ ასევე, მოახდინა „საერთაშორისო დაცვის შესახებ“ ახალი კანონის იმპლემენტაცია. კანონი შეიმუშავეს იმგვარად, რომ მთავრობას ლტოლვილის სტატუსზე, თავშესაფარზე ან სხვა საერთაშორისო დაცვაზე უარის თქმა შეუძლია იმ პირებისთვის, რომელთა მიმართაც არსებობს საკმარისი საფუძველი ვარაუდისთვის, რომ ჩართულნი იყვნენ ტერორისტულ აქტში და/ან აქვთ კავშირი ტერორისტულ ორგანიზაციასთან“, - წერია სახელმწიფო დეპარტამენტის ანგარიშში.