მამუკა ბახტაძე: საქართველო ბიზნესის კეთების სიმარტივით მოწინავე ქვეყანაა

საქართველო ბიზნესის კეთების სიმარტივის კუთხით მოწინავე ქვეყანაა და ჩვენი სურვილია, ვიხილოთ მეტი ამერიკული კომპანიის ინვესტიცია საქართველოში,- ამის შესახებ საქართველოს პრემიერმინისტრმა ვაშინგტონში, აშშ-ის ბიზნესწრეების წარმომადგენლებთან შეხვედრისას განაცხადა. 

მამუკა ბახტაძემ ამერიკული კომპანიების ხელმძღვანელ პირებს საქართველოში განხორციელებული რეფორმები გააცნო, რომლებიც სწრაფი ეკონომიკური ზრდის უზრუნველყოფასა და მცირე და საშუალო ბიზნესის განვითარების ხელშეწყობას ისახავს მიზნად. 

მთავრობის ადმინისტრაციის ცნობით, შეხვედრისას ხაზი გაესვა საქართველო-აშშ-ის სტრატეგიულ პარტნიორობას და ითქვა, რომ ორმხრივი ეკონომიკური ურთიერთობების განვითარებაში მნიშვნელოვანი წინგადადგმული ნაბიჯი შეიძლება გახდეს თავისუფალი ვაჭრობის შესახებ შეთანხმება. 

მამუკა ბახტაძემ ისაუბრა საქართველოს დემოკრატიულ და ეკონომიკურ ტრანსფორმაციაზე და ქვეყნის პოტენციალზე, ჩამოყალიბდეს ბიზნესის, ვაჭრობის, ლოგისტიკისა და ტურიზმის ჰაბად. 

მთარობის მეთაური ამერიკელ ბიზნესმენებს დეტალურად ესაუბრა ყოვლისმომცველი რეფორმების გეგმაზე, განხორციელებულ  საგადასახადო რეფორმაზე და განაცხადა, რომ საქართველო იმ მოწინავე ქვეყანათა რიგებშია, სადაც ყველაზე დაბალი გადასახადებია. 

მამუკა ბახტაძემ შეხვედრისას ყურადღება დაუთმო ქვეყნის ინფრასტრუქტურულ მოდერნიზაციას, საავტომობილო მაგისტრალების, რკინიგზის განვითარებისა და ანაკლიის ღრმაწყლოვანი პორტის პროექტებს, ციფრულ ტრანსფორმაციასა და ელექტრონული სერვისების დანერგვასთან დაკავშირებულ გეგმებს. 

პრემიერმა განათლების რეფორმის მნიშვნელობა გაამხვილა ყურადღება და განაცხადა, რომ საქართველოს მთავრობის მიზანია, ის ეკონომიკაში დომინანტი სექტორი გახდეს, ვინაიდან ადამიანური კაპიტალის განვითარება ძალიან მაღალი პრიორიტეტია. 

შეხვედრისას ასევე საუბარი შეეხო საქართველოს მთავრობის გარემოსდაცვით ხედვას “მწვანე პოლიტიკა”, რომელიც ეკოლოგიის გაჯანსაღებას, ბუნებრივი რესურსების შენარჩუნებას და ორგანული პროდუქტის წარმოების ხელშეწყობას ისახავს მიზნად.

პრემიერი აშშ-ში სამუშაო ვიზიტით იმყოფება.