ზურაბ აბაშიძე: ოკუპირებულ რეგიონებთან დაკავშირებით რუსეთის პოლიტიკაში არაფერი შეცვლილა

პრაღაში აბაშიძე-კარასინის შეხვედრის ფარგლებში, რუსეთთან ურთიერთობის საკითხებში საქართველოს პრემიერმინისტრის სპეციალურმა წარმომადგენელმა ზურაბ აბაშიძემ განაცხადა, რომ ოკუპირებულ რეგიონებთან მიმართებით რუსეთის პოლიტიკაში სიახლე ვერ დაინახა. ინფორმაციას 1tv ავრცელებს.

ზურაბ აბაშიძის თქმით, რუსეთის მხრიდან ამ საკითხზე ახალი ვერაფერი მოისმინა. 

"მათი ხედვა საერთო ჯამში მიდის პოლიტიკურ მიდგომამდე, რომ აფხაზეთი და ცხინვალის რეგიონი დამოუკიდებელი სახელმწიფოები არიან და თქვენ მათ უნდა ესაუბროთ ყველა პრობლემაზე. რუსეთი არაფერ შუაშია არ არის. ასეთია რუსეთის მიდგომა და ეს მიდგომა ქმნის იმ ჩიხურ ვითარებას, რომელშიც ქართულ-რუსული ურთიერთობები მოექცა 2008 წლის, ანუ მას შემდეგ, რაც რუსეთმა აღიარა ამ ორი რეგიონის ე.წ.დამოუკიდებლობა.

სამწუხაროდ, ვერც დღეს ვერ დავინახეთ ვერანაირი მინიშნება, რომ რაღაც სიახლეა ამ თვალსაზრისით რუსეთის ხედვებში, მიდგომებში, რუსეთის პოლიტიკაში და ეს არ იძლევა ოპტიმიზმის საფუძველს“,- განაცხადა ზურაბ აბაშიძემ.

აბაშიძის თქმით, მათი ხედვაა, რომ დიალოგი იმ საკითხებზე, სადაც შეხების წერტილები არსებობს, უნდა გაგრძელდეს და ამ პოლიტიკას სრული მხარდაჭერა აქვს დასავლელი პარტნიორების მხრიდან.

„ისინი მოგვიწოდებენ, რომ გავაგრძელოთ ეს რთული დიალოგი. რაც შეეხება ჩვენს პრაქტიკულ მიმართულებას, ვიცავთ კონკრეტული კომპანიების ინტერესებს. მხედველობაში მაქვს საავიაციო, საავტომობილო მიმოსვლა, სატვირთო გადაზიდვები. ეს ყველაფერი ძალიან იზრდება. გვაქვს მზარდი დინამიკა. სავაჭრო ბრუნვა 24 % -ით არის გაზრდილი. ამას ყურადღება სჭირდება. ამაში უამრავი ქართული კომპანიაა ჩართული. მათ აქვთ ტექნიკური ხასიათის და ზოგადი ხასიათის პრობლემები. ამას ვცდილობთ მივხედოთ. ჩვენს დელეგაციაში არიან ეკონომიკის და საგარეო საქმეთა სამინისტროს წარმომადგენლები. დავბრუნდებით საქართველოში და შევეცდებით, რომ ადგილზე მოვუნახოთ ამ ყველაფერს შესაბამისი გადაწყვეტილებები“,- განაცხადა ზურაბ აბაშიძემ.

ზურაბ აბაშიძის თქმით, რუსეთის საგარეო საქმეთა მინისტრის მოადგილემ გრიგორი კარასინმა მასთან შეხვედრაზე პრემიერმინისტრ მამუკა ბახტაძის მიერ გაეროს 73-ე ასამბლეის ფარგლებში წარმოთქმული სიტყვა ახსენა.

"გრიგორი კარასინმა მიხსენა საქართველოს პრემიერ-მინისტრის გამოსვლა გაერო-ში და თქვა, რომ მათთვის გაუგებარია მამუკა ბახტაძის მოწოდებები ოსებისადმი, აფხაზებისადმი და რუსეთის მხარისადმი, რომ რუსეთი ხელს არ უწყობს ჩვენს კონტაქტებს აფხაზებთან და ოსებთან", - თქვა ზურაბ აბაშიძემ.

შეხვედრის დაწყებამდე გრიგორი კარასინმა განაცხადა, რომ საქართველოსა და რუსეთის ლიდერების შეხვედრა გამორიცხული არ არის. მან ასევე კომენტარი გააკეთა საქართველოში საპრეზიდენტო არჩევნებთან დაკავშირებით.

მამუკა ბახტაძემ გაეროს 73-ე ასამბლეის ფარგლებში, რუსეთს ნაკისრი ვალდებულებების შესრულებისკენ და საქართველოდან ჯარების გაყვანისკენ მოუწოდა.