კობახიძე: ზოგიერთი პოლიტიზებული პერსონის გამო არასამთავრობო სექტორის იდეა ზიანდება

პარლამენტის თავმჯდომარის ირაკლი კობახიძის განცხადებით, ის, ვინც ფაშისტს ხელს აფარებს, თავადაც ფაშისტია. ასე გამოეხმაურა ირაკლი კობახიძე "რუსთავი2"-ის გენერალური დირექტორის განცხადების შესახებ არასამთავრობო სექტორის დუმილს, საგანგებო ბრიფინგზე.

პარლამენტის თავმჯდომარის თქმით, სამოქალაქო სექტორის როლი და სამოქალაქო საზოგადოების იდეა უმნიშვნელოვანესია, თუმცა როგორც კობახიძე ამბობს, ზოგიერთი ორგანიზაციის სათავეში მდგომი ადამიანები, პოლიტიკური ანგაჟირებულობის ან მიკუთვნებულობის გამო, ამ იდეას აზიანებენ.

"პერსონალიები, რომლებიც ზოგიერთ ორგანიზაციას სათავეში უდგანან, სამწუხაროდ, პოლიტიკურად ანგაჟირებულობის ან პოლიტიკური მიკუთვნებულობის გამო, აზიანებენ თავად ამ იდეას. ჩვენი შეშფოთების საგანი სწორედ ესაა, რომ ზოგიერთი პოლიტიზირებული პერსონის გამო, ზიანდება თავად იდეა და არასამთავრობო სექტორის როლი სამოქალაქო საზოგადოების  ჩამოყალიბებაში, რაც დაუშვებელია. გვინდა, ხაზგასმით განვაცხადოთ, ვინც ხელს აფარებს ფაშისტს, თავადაც არის ფაშიზმის თანამონაწილე. სამწუხაროა, რომ ასეთი ადამიანები არასამთავრობო ორგანიზაციების ხელმძღვანელებს შორისაც არიან.

ქართული ფაშიზმი ჩვენ ჩავაბარეთ წარსულს 2012 წელს და პასუხისმგებელნი ვართ იმაზე, რომ საქართველოში მომავალში ვეღარ გაიდგამს ფესვებს. 28 ოქტომბერს კიდევ ერთხელ ყველამ უნდა გავცეთ საკადრისი პასუხი ნაციონალური მოძრაობის ისტერიულ და უნიათო ფაშიზმს და ხმა მივცეთ ჭეშმარიტად ევროპულ, ევროპელ და ღირსეულ კანდიდატს სალომე ზურაბიშვილს", – განაცხადა ირაკლი კობახიძემ.

პარტია "ქართული ოცნება - დემოკრატიული საქართველოს" ცენტრალურ ოფისში ირაკლი კობახიძემ ბრიფინგი გამართა, რომელზეც ნიკა გვარამიას რამდენიმე დღის წინ Facebook-ზე გამოქვეყნებული პოსტი გააკრიტიკა. პოსტში ნიკა გვარამია წერს, რომ ყველა ვინც ზურაბიშვილს უჭერს მხარს და მის საარჩევნო კამპანიას აფინანსებს, საზოგადოებამ უნდა დაიმახსოვროს, რომ ისინი "მოღალატის გვერდში მდგომი ხალხია".