ზურაბიშვილი: ტელევიზიის დირექტორმა კამპანიის დროს კანდიდატს ასე არ უნდა მიმართოს

საპრეზიდენტო კანდიდატი პარლამენტის თავმჯდომარის ირაკლი კობახიძის მიერ "რუსთავი 2"-ის გენდირექტორის ნიკა გვარამიას შესახებ გაკეთებულ განცხადებას ეხმიანება. ამის შესახებ კომენტარი ზურაბიშვილმა სიღნაღში ამომრჩეველთან შეხვედრაზე გააკეთა.

სალომე ზურაბიშვილილმა არასამთავრო ორგანიზაციების განცხადებები გაიხსენა, რომელშიც მას ქსენოფობი უწოდეს.

"სხვათაშორის ამის შესახებ ელჩებთან მქონდა შეხვედრა, სადაც გავაცანი ტექსტი, რომელიც არ არის საკადრისი ტელევიზის გენერალური დირექტორისგან საარჩევნო კამპანიის დროს, რომ ასე მიმართოს რომელიმე კანდიდატს. ამას ხაზს გავუსვამ. ასევე, გამოვთქვი ჩემი მწუხარება, რომ არასამთავრობო ორგანიზაციებთან, რომლებთანაც მომავალში დამჭირდება ძალიან მჭიდრო ურთიერთობა, როგორც პრეზიდენტს და როგორც ყველას უფლებების დამცველს, ამ შემთხვევაში მე არ ვიყავი დაცული, როცა ზღვა ცილისწამების და ღვარძლით წამოვიდა ჩემზე. პირადად, სახელით და გვარით დამარქვეს ქსენოფობი, რაც არის შეურაცხყოფა და არამხოლოდ ჩემთვის, არამედ იმ ქვეყნისთვის რომელსაც წარმოვადგენდი 30 წლის განმავლობაში, რომელმაც ღირსების ორდენი და ლეგიონი მომცა", - განაცხადა სალომე ზურაბიშვილმა.

2 ოქტომბერს, ნინოწმინდაში, წინასარჩევნო კამპანიის ფარგლებში, ადგილობრივ ეთნიკურად სომეხ მოქალაქეებთან შეხვედრისას, ზურაბიშვილმა განაცხადა: “აქამდე მოქალაქეობა იყო მხოლოდ მინიჭებით და მხოლოდ პრეზიდენტის საბოლოო გადაწყვეტილებით და ერთმა პრეზიდენტმა [მიხეილ სააკაშვილი], ძალიან ბევრი მოქალაქეობა დაურიგა თურქებს, დღეს მისი წარმომადგენელი არის ჩემი ოპონენტი, მაგრამ თქვენ არ მოგცათ მოქალაქეობა”. სწორედ ეს განცხადება არასამთავრობოებმა ქსენოფობიურად შეფასეს. 

პარლამენტის თავმჯდომარემ ირაკლი კობახიძემ "რუსთავი 2"-ის გენერალურ დირექტორის ნიკა გვარამიას Facebook-პოსტი გააკრიტიკა და თქვა, რომ ნიკა გვარამიას განცხადება ხელმოცარული ფაშისტის განცხადებაა. კობახიძემ არასამთავრობო სექტორიც გააკრიტიკა და თქვა, რომ ზოგიერთი პოლიტიზირებული პერსონის გამო არასამთავრობო სექტორის იდეა ზიანდება.

პოსტში ნიკა გვარამია წერს, რომ ყველა ვინც ზურაბიშვილს უჭერს მხარს და მის საარჩევნო კამპანიას აფინანსებს, საზოგადოებამ უნდა დაიმახსოვროს, რომ ისინი "მოღალატის გვერდში მდგომი ხალხია".

გვარამიას პოსტის შესახებ 5 ოქტომბერს ინფორმაცია სალომე ზურაბიშვილმა ევროკავშირის ელჩებს მიაწოდა. მან ასევე განაცხადა რომ მსოფლიოში არასამთავრობოები ქალებს იცავენ, "ჩვენთან მის წინააღმდეგ ილაშქრებენ".

საქართველოში საპრეზიდენტო არჩევნები 2018 წლის 28 ოქტომბერს გაიმართება.