როგორ ადანაშაულებდა გრიგოლ ვაშაძე ჯაშუშობისთვის დაკავებულ ფოტოგრაფებს. ვიდეო

ფოტორეპორტიორებმა ნათია და ირაკლი გედენიძეებმა სოციალურ ქსელში 2011 წლის 18 ივლისის ინფორმაცია გაავრცელეს, სადაც მაშინდელი საქართველოს საგარეო საქმეთა მინისტრი გრიგოლ ვაშაძე მათ მძიმე ბრალდებებს უყენებდა.

დღეს, "ნაციონალური მოძრაობის" საპრეზიდენტო კანდიდატმა გრიგოლ ვაშაძემ ინფორმაცია უარყო და თქვა, რომ ფოტოგრაფების საქმეზე მსგავსი რამ არასდროს უთქვამს.  ვაშაძემ განაცხადა, რომ წარმოდგენა არ აქვს, ვინ არის გიორგი აბდალაძე.

„არასოდეს ეს არ მითქვამს. ნუ ამახინჯებთ ჩემს ციტატებს. არასოდეს ასეთი რამ არ მითქვამს, არასდროს. მე ვიძახდი, რომ სამართალდამცავები და პროკურატურა ამბობს, რომ არსებობს მყარი მტკიცებულებები და ისინი გაერკვევიან ამ საქმეში“, - განაცხადა გრიგოლ ვაშაძემ.

1tv.ge-მ გაავრცელა საარქივო ვიდეომასალა, რომელშიც „ნაციონალური მოძრაობის“ პრეზიდენტობის კანდიდატი გრიგოლ ვაშაძე 2011 წლის ივლისში ფოტოგრაფების დაკავების საქმეზე საუბრობს. ვიდეომასალა ტელეკომპანია „მაესტროს“ ეთერში 2011 წლის 18 ივლისის 15:00-საათიან საინფორმაციო გამოშვებაში გავიდა.

„თქვენ იცით, რომ საქმეში არის უკიდურესად მძიმე მტკიცებულებები, ეს მტკიცებულებები წარედგინება სასამართლოს, მეორე - ბრალდებულებმა მისცეს აღიარებითი ჩვენებები. მე უკვე ნათქვამი მქონდა თქვენს წინა შეხვედრაზე, რომ ეს ასეც მოხდება, რადგან კიდევ ერთხელ ვიმეორებ, საქმეში არის უკიდურესად მძიმე მტკიცებულებები.

რაც შეეხება  ე.წ. ზოგიერთი ჩვენი მასმედიის, ჩვენი პრესის რეაქციას, სიმართლე გითხრათ, ძალიან უკმაყოფილო ვარ, რადგან იძლევიან სრულიად უსაფუძვლო შეკითხვებს, მაგალითად, იმას ჰქონდა დაშვება, თუ არა. გეგონება, ჯაშუში მოქმედებს იმის მიხედვით, რაზე აქვს დაშვება, ან არა. ისიც მაინტერესებს, მოუხდიან თუ არა ჩვენს სამართალდამცველებს ბოდიშს ჟურნალისტები მაშინ, როდესაც სასამართლოში გამოაშკარავდება ყველა ის მტკიცებულება, რომელიც ახლა საქმეშია“, - ამბობს გრიგოლ ვაშაძე 2011 წელს ფოტოგრაფების საქმესთან დაკავშირებით.

პროკურატურამ ე.წ ფოტოგრაფების საქმე 2016 წელს გახსნა. უწყების განცხადებით ფოტოგრაფები: გიორგი აბდალაძე, ზურაბ ქურციკიძე და ირაკლი გედენიძე ჯაშუშობის გამოგონილი ბრალდებით დააკავეს და მათ ხელისუფლება 26 მაისის აქციის დაშლის აქტიური გაშუქების გამო გაუსწორდა. 

ფოტორეპორტიორმა, გიორგი აბდალაძემ „ტელეიმედის“ ეთერში რამდენიმე დღის წინ ფოტორეპორტიორების (ნათია გედენიძე, გიორგი აბდალაძე, ირაკლი გედენიძე, ზურაბ ქურციკიძე) დაკავების საქმე გაიხსენა და აღნიშნა: „გრიგოლ ვაშაძემ უფრო კარგად იცის და მითხრას, რატომ გამიშვა ციხეში, რატომ აწამებინა ჩემი თავი? ხომ დამიჭირე, რატომ გამიშვი ერთ კვირაში, თუ ორ კვირაში“.