არასაპარლამენტო ოპოზიციამ შეიძლება საკონსტიტუციო კომისია დატოვოს

არასაპარლამენტო ოპოზიციის წარმომადგენლის, ნინო ბურჯანაძის პარტიის წევრის, გიორგი ახვლედიანის თქმით, ოპოზიციის წინადადებების სრული იგნორირების შემთხვევაში, პარტიების ადგილი საკონსტიტუციო კომისიაში აღარ იქნება. "ბიძინა ივანიშვილის სასურველი ცვლილებების განხორციელებაში ჩვენ მონაწილეობას არ მივიღებთ", - განაცხადა ახვლედიანმა დღეს, სასტუმრო "რადისონში", არასამთავრობოების მიერ მოწყობილი შეხვედრის ფარგლებში, სადაც საკონსტიტუციო ცვლილებების საკითხს განიხილავენ. 

არასაპარლამენტო პარტიები საარჩევნო ბლოკებისთვის არჩევნებში მონაწილეობის უფლებას, პრეზიდენტის პირდაპირი წესით არჩევას, საარჩევნო ბარიერის დაწევას და საარჩევნო სისტემის ცვლილებას ითხოვენ. "თუ 15 აპრილამდე არ გვექნება ხელისუფლებისგან პასუხი, რევოლუციური პროცესები გამორიცხული არ არის, რადგან კონსტიტუციას სჭირდება მნიშვნელოვანი ცვლილებები", - დასძინა გიორგი ახვლედიანმა.

არასაპარლამენტო ოპოზიციის განცხადებას უკვე გამოეხმაურა პარლამენტის თავმჯდომარე ირაკლი კობახიძე. მისი თქმით, საკონსტიტუციო კომისია 73 წევრისგან არის დაკომპლექტებული და ყველას აქვს თავისი მოსაზრების გამოთქმის შესაძლებლობა. "შესაბამისად, მათი წინადადებების ნაწილი უკვე გაზიარებულია", - ამბობს ირაკლი კობახიძე.

პარლამენტის თავმჯდომარემ განმარტა, რომ კომისიას საკუთარი დღის წესრიგი აქვს, რომლის თანახმად, მომზადებული დოკუმენტი ყველა დასმულ შეკითხვას უპასუხებს. „ამ დღის წესრიგის თანახმად, 10 აპრილის კვირაში გაიმართება დისკუსიების მესამე რაუნდი, რის შემდეგაც ჩვენ არა მარტო ჩვენს მოსაზრებებს, არამედ კომისიის კონკრეტულ პროექტს წარვუდგენთ პლენარულ სხდომას და უკვე აპრილის ბოლოს დამტკიცდება საბოლოო დოკუმენტი, რომელიც ინიციატივის სახით იქნება შეტანილი საქართველოს პარლამენტში“, - განაცხადა ირაკლი კობახიძემ.