ზვიად ქორიძე შეწყალების კომისიის დატოვების შემდეგ პირველ კომენტარს აკეთებს

შეწყალების კომისიის თავმჯდომარის თანამდებობიდან წასვლა ჩემი გადაწყვეტილება იყო, პრეზიდენტ სალომე ზურაბიშვილს ეს კომისია რომც დაეტოვებინა, მე მაინც წამოვიდოდი, - ამის შესახებ შეწყალების კომისიის ყოფილმა თავმჯდომარემ, ზვიად ქორიძემ განაცხადა. მის განცხადებას 1tv.ge ავრცელებს.

მისი თქმით, შესაბამისი განცხადებით ადმინისტრაციას 31 დეკემბერს მიმართა.

„ეს ჩემი გადაწყვეტილება იყო და არავის შეეძლო, გავლენა მოეხდინა. კომისია სათათბირო ორგანოა და მასში უნდა იყვნენ ადამიანები, რომლებსაც პრეზიდენტთან აქვთ ღირებულებითი ერთობა და ურთიერთნდობა. ამდენად, ახალი პრეზიდენტი თავისუფალი უნდა ყოფილიყო და მიეღო გადაწყვეტილება, შეექმნა შეწყალების კომისია, რომელიც იმუშავებს მასთან. ეს გადაწყვეტილება თავიდანვე მქონდა მიღებული, თუმცა ველოდი, რომ ინაუგურაციის შემდეგ ორი კვირის განმავლობაში პრეზიდენტი დაინტერესდებოდა კომისიის საქმიანობით და მუშაობის პრაქტიკით, მაგრამ ასე არ მოხდა. ამიტომ შევიტანე განცხადება და გამოვხატე ჩემი ნება. ეს კომისია რომც დაეტოვებინა ზურაბიშვილს, მე მაინც წამოვიდოდი კომისიიდან”, - განაცხადა ზვიად ქორიძემ.

პრეზიდენტის ადმინისტრაციაში აცხადებენ, რომ ისინი კომისიის ახალი წევრებით დაკომპლექტებას გეგმავენ, რაც მათი თქმით, ჩვეულებრივი პროცესია. 

ზვიად ქორიძემ და რამდენიმე წევრმა კომისია დღეს დატოვეს.