ეკა ბესელია: ირაკლი კობახიძემ პირველმა დაარღვია გუნდურობის წესები

პარლამენტის იურიდიულ საკითხთა კომიტეტის ყოფილი თავმჯდომარის ეკა ბესელიას თქმით, მისი სამომავლო გეგმები პარლამენტის გადაწყვეტილებაზეა დამოკიდებული, რომელიც უზენაესი სასამართლოს მოსამართლეობის კანდიდატებს უკავშირდება. 

ამასთან, ეკა ბესელია პარლამენტის თავმჯდომარეს ირაკლი კობახიძეს სიცრუეში ადანაშაულებს და ამბობს, რომ სწორედ კობახიძემ დაარღვია გუნდურობის წესები. 

"კობახიძე პოლიტიკაში ახალია და ნამდვილად ვგულშემატკივრობ, რომ მან არ დაუშვას ისეთი შეცდომები, რომლებიც ინსტიტუციას დააზარალებს. მან პირველმა დაარღვია ის წესი, რომლისკენაც გუნდის სხვა წევრებს მიუთითებს. ვგულისხმობ იმას, რომ გადადგომის თაობაზე ჩემი განცხადება როდესაც გაკეთდა, მან პირველმა გააკეთა კრიტიკული და საპირისპირო განცხადება. ეს იყო სიცრუე, როდესაც მან სცადა სხვა ვერსიების შემოეტანა ამ პროცესში, ეს ვერსია უბრალოდ ბუნებაში არ არსებობს", - განაცხადა ეკა ბესელიამ ჟურნალისტებისთვის მიცემულ კომენტარში.

ეკა ბესელიამ კიდევ ერთხელ განაცხადა, რომ სწორედ კობახიძის იდეა იყო წლის ბოლო სამუშაო დღეს კომიტეტის სხდომის ჩატარება, სადაც დაჩქარებული წესით უზენაესი სასამართლოს მოსამართლეობის კანდიდატთა 10-კაციან სიაზე იმსჯელებდნენ. 

ბესელია დასძენს, რომ იყო კიდევ რამდენიმე საკითხი, რაზეც მმართველ გუნდში შემავალ მცირე ჯგუფს (როგორც თვითონ ამბობს) არ დაეთანხმა. "სწორედ მაშინ დადგა საკითხი, როგორ ჩამოეშორებინათ ეკა ბესელია იურიდიული კომიტეტის თავმჯდომარის პოზიციიდან", - თქვა ბესელიამ. 

დღეს ირაკლი კობახიძემ განაცხადა, რომ ბესელიასთვის კაბინეტის მომზადება სექტემბერში დაიწყო, მაშინ როდესაც უზენაესი სასამართლოს მოსამართლეების კანდიდატთა სია არ იყო აქტუალური. თუმცა კობახიძე ამბობს, რომ დღეს მის მოადგილედ, პარლამენტის ვიცესპიკერად ეკა ბესელიას დანიშვნის საკითხი აღარ განიხილება.

ამასთან, ირაკლი კობახიძემ განაცხადა, რომ ზოგიერთი დეპუტატი პარტიის პოლიტსაბჭოს მიღმა იმიტომ აღმოჩნდა, რომ მათ გარკვეული წესები დაარღვიეს. 

"ჩვენ ვნახეთ, რომ ეს პრინციპი იყო შარშან ამ დროსაც, არაერთგზის დარღვეული სხვადასხვა დეპუტატის მიერ, თუმცა, მაშინ მოვახერხეთ პრობლემის გადაჭრა. დღესაც ვხედავთ, რომ ირღვევა გარკვეული წესები, გუნდურობის პრინციპები, თუმცა, ვფიქრობთ, რომ აქაც შევძლებთ ჩვენ ამ პრობლემის მოგვარებას", - განაცხადა კობახიძემ, მაგრამ კონკრეტული გვარების დასახელებისგან თავი შეიკავა. 

"ქართული ოცნება ერთიანია, ეს არის ბიძინა ივანიშვილის გუნდი, არავის ვურჩევ ამ გუნდის წინააღმდეგ წასვლას", - თქვა კობახიძემ.

დღეს ცნობილი გახდა, რომ შექმნილ ვითარებასთან დაკავშირებით მმართველ გუნდში უმრავლესობის სხდომა გაიმართება.