პარლამენტში ახალი კრიტერიუმებით მოსამართლეთა განახლებულ სიას წარადგენენ

საქართველოს პარლამენტის თავმჯდომარესა და იუსტიციის უმაღლესი საბჭოს მდივნის შეხვედრა პარლამენტში დასრულდა. ირაკლი კობახიძის თქმით, მათ მოსამართლეთა შერჩევის პროცესის შესახებ ისაუბრეს. 

„მოსამართლეთა შერჩევის პროცედურა და კრიტერიუმები იქნება მსჯელობის საკითხი. ზოგადად უნდა აღვნიშნო, რომ ეს არის პოლიტიკური პროცედურა, შესაბამისად, უნდა დაექვემდებაროს იმ ლოგიკას, რომელიც არის რელევანტური შესაბამისი კონსტიტუციურ-სამართლებრივი პროცედურისთვის.

დეტალურად ვიმსჯელებთ პროცედურასა და კრიტერიუმებზე და მივიღებთ გადაწყვეტილებას...  იურიდიულად, მოსამართლეთა კანდიდატთა სიის გაწვევა არის შეუძლებელი. ეს არ არის კანონმდებლობის ხარვეზი, ეს არის პრინციპული ნორმა, რომელიც დაკავშირებულია ყველა კონსტიტუციურ პროცედურასთან, იქნება ეს მოსამართლეთა წარდგენა თუ თუნდაც მთავრობის ან გენერალური აუდიტორის. შესაბამისად, სიის გაწვევა არის შეუძლებელი, თუმცა ხაზგასმით მინდა აღვნიშნო, რომ ამ პროცედურასა და კრიტერიუმებს ექნება უკუძალა იმ კანდიდატებისთვის, რომლებიც წარმოდგენილი არიან დეკემბერში იუსტიციის უმაღლესი საბჭოს მიერ“, - განაცხადა ირაკლი კობახიძემ.

მისი თქმით, ორგანული კანონი დაადგენს მოსამართლეთა შერჩევის კრიტერიუმებს, კანონის ამ დებულებას ექნება უკუქცევითი ძალა და სწორედ ამ კრიტერიუმების მიხედვით იქნება წარმოდგენილი მოსამართლეთა განახლებული სია.

„არსებითი პოლიტიკური გადაწყვეტილება არის მიღებული, რომ ჯერ იქნება შემუშავებული პროცედურა და კრიტერიუმები და შემდეგ იქნება ახალი სია წარმოდგენილი. როგორ განახლდება სია, ეს არის ტექნიკური დეტალი. ერთ-ერთ ვერსიად განიხილება ძველი სიის ფორმალურად ჩაგდება“, - განაცხადა კობახიძემ.

შეგახსენებთ, იუსტიციის უმაღლესმა საბჭოს პარლამენტს უზენაესი სასამართლოს მოსამართლეობის კანდიდატების ათკაციანი სია 2018 წლის დეკემბერში წარუდგინა.

4 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

კანდიდატები არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.

მოსამართლეთა სიამ მმართველ გუნდსა და საზოგადოებაში მწვავე კრიტიკა და დისკუსია გამოიწვია.