ზურაბიშვილმა შტაინმაიერთან საქართველოს ევროკავშირში ინტეგრაციის საკითხი განიხილა

სალომე ზურაბიშვილი გერმანიაში ვიზიტის ფარგლებში ქვეყნის პრეზიდენტს ფრანკ-ვალტერ შტაინმაიერს ბელვიუს სასახლეში შეხვდა.

საქართველოს პრეზიდენტის პრესსამსახურის ცნობით, შეხვედრებზე, რომლებიც ბელვიუს სასახლეში პირისპირ და გაფართოებულ ფორმატში გაიმართა, მხარეებმა საქართველო-გერმანიის ორმხრივი ურთიერთობები და საქართველოს ევროპული მისწრაფებები განიხილეს.

შეხვედრაზე აღინიშნა გერმანიის განსაკუთრებული როლი საქართველოს ევროკავშირში ინტეგრაციის პროცესში, რადგან გერმანია ევროკავშირის ლიდერი ქვეყანაა და მისი აზრი და დამოკიდებულება საქართველოს მიმართ ძალიან მნიშვნელოვანია.

როგორც სალომე ზურაბიშვილმა შეხვედრებზე განაცხადა, მნიშვნელოვანია, რომ საქართველოს ევროპის გულში, გერმანიის სახით, ასეთი ერთგული მეგობარი ჰყავდეს.

„ყველამ საქართველოში იცის, რადენად ერთგული მეგობარი იყო და არის გერმანია და რამდენად მნიშვნელოვანი არის, რომ ევროპის გულში საქართველოს ყავდეს ასეთი მყარი მეგობარი, რომელიც იცავს საქართველოს ტერიტორიულ მთლიანობას, რომელიც მხსრს უჭერს იმ ძალიან მნიშვნელოვან სადამკვირვებლო მისიას,რომელიც არის ჩვენს ოკუპირებული ტერიტოროების ხაზზე და რომელიც არის ერთადერთი საერთაშორისო ასეთ ფორმატი, რომელიც დღევანდელი საქართველოსთვის, ამ მდგომარეობაშიც კი არის ძალიან მნიშვნელოვანი"-განაცხადა სალომე ზურაბიშვილმა.

პრეზიდენტის თქმით, გერმანია და საფრანგეთი არიან ის ქვეყნები, რომლებიც საქართველოს ხელს შეუწყობენ იმაში, რომ ჩვენი ქვეყანა მალე გახდეს ევროპული ოჯახის სრულფასოვანი წევრი.

საქართველოს პრეზიდენტმა იმედი გამოთქვა, რომ საქართველო-გერმანიის ურთიერთობები, მისი ვიზიტის შემდეგ, ახალ ეტაპზე გადავა. 

ამასთან, სალომე ზურაბიშვილმა ფრანკ-ვალტერ შტაინმაიერი საქართველოში მოიწვია. 

„ვიცი, რომ თქვენ გაინტერესებთ არამხოლოდ თბილისში ჩამოსვლა, არამედ რეგიონში ჩასვლა და ეს არის ჩემთვის ძალიან დიდი სიხარული, რადგანაც საარჩევნო კამპანიაში, კულტურასთან ერთად, კიდევ ერთი პრიორიტეტი მქონდა, რომ რეგიონების განვითარებას შევუწყოთ ხელი. ეს არის საქართველოსთვის ძალიან მნიშვნელოვანი და ვიცი, რომ გერმანიის მიწები​ს სტრუქტურა არის დაკავშირების საშუალება და იმედი მაქვს, ამაშიც გვექნება თანამშრომლობის ახალი ტალღა. თქვენი ძალიან დიდი იმედი მაქვს ამ კუთხით“, – განაცხადა სალომე ზურაბიშვილმა.

დღეს სალომე ზურაბიშვილი გერმანიის კანცლერს ანგელა მერკელსაც შეხვდება.

მანამდე საქართველოს პრეზიდენტი საფრანგეთში იმყოფებოდა. ელისეს სასახლეში საქართველოს პრეზიდენტ სალომე ზურაბიშვილისა და საფრანგეთის პრეზიდენტ ემანუელ მაკრონის პირისპირ შეხვედრა გაიმართა.