ადვოკატთა ნაწილი სასამართლო სხდომებიდან კიდევ 9 მოსამართლის აცილებას ითხოვს

ადვოკატთა ნაწილი, რომელმაც გუშინ ლევან მურუსიძის წინააღმდეგ კამპანია "აიცილე ლევან მურუსიძე" დაიწყო, კიდევ 9 მოსამართლის აცილებას ითხოვს. 10 მოსამართლის სასამართლო სხდომებიდან აცილების მოთხოვნით პეტიციის შექმნაც იგეგმება. ინფორმაციას სააგენტო "ინტერპრესნიუსი" ავრცელებს.

საუბარია, როგორც სააპელაციოს სასამართლოს მოსამართლეებზე - ლევან მურუსიძესა და მიხეილ ჩინჩალაძეზე, ასევე საბჭოს იმ რვა მოსამართლე წევრზე, რომელმაც უზენაესი სასამართლოს მოსამართლეობის კანდიდატთა პარლამენტში წარდგენილ სიას მხარი დაუჭირა. ეს მოსამართლეები არიან: გიორგი მიქაუტაძე, ვასილ მშვენიერაძე, სერგო მეთოფიშვილი, ირაკლი შენგელია, რევაზ ნადარაია, ირაკლი ბონდარენკო, დიმიტრი გვრიტიშვილი და თამარ ონიანი.

"ვიდეორგოლი მოწოდებით "აიცილე მოსამართლე ლევან მურუსიძე" საერთო ჯამში, ეხება 10 მოსამართლეს. გუშინდელი "ფეიბუქ პოსტები" იმის ლუტრაციაა, თუ რასთან გვაქვს საქმე, თუ როგორ ზომავენ და განსაზღვრავენ მოსამართლეები საკითხებს. თურმე აზრის გამოხატვა ყოფილა დანაშაული და ამაზე სასჯელი უნდა დაწესდეს. შეიძლება ითქვას, რომ მოსმართლეები საერთოდ გასცდნენ თავიანთ მანდატსა და ჩარჩოებს, გამოვიდნენ სამართლებრივი საზღვრებიდან. "ფეისბუქზე" იყო რამდენიმე მოსამართლის გამოხმაურება, მათ შორის დიმიტრი გვრიტიშვილმა და სერგო მეთოფიშვილმა გამოთქვეს აზრი, რომ მოსამართლის აცილების გამო ადვოკატი უნდა დაჯარიმდეს. მოსამართლის აცილებას რომ აყენებ, კითხვები და ეჭვები გაქვს მის საქმიანობასთან დაკავშირებით. თურმე ეს შეიძლება გახდეს ადვოკატის დაჯარიმების საფუძველი სასამრთლოს მხრიდან. მათ ასევე მუქარის შემცველი მესიჯები გამოგზავნეს ადვოკატების წინააღმდეგ და საკითხი დააყენეს, რომ ადვოკატები ამ მოწოდებას გაემიჯნონ, რა მოწოდებაც ვიდეორგოლით გავრცელდა“, - განაცხადა გიგი სისვაძემ.

კამპანიას Facebook-ზე მოსამართლე და იუსტიციის უმაღლესი საბჭოს წევრი დიმიტრი გვრიტიშვილი გამოეხმაურა. გვრიტიშვილის თქმით, ეს კამპანია "იმ ბინძური, უსაფუძვლო კამპანიის ნაწილი, რაც ბოლო წლებია წარმოებს ლევან მურუსიძის მიმართ".

მოსამართლე წერს, რომ ადვოკატები ახლა უკვე ამ ფორმით აგრძელებენ სასამართლო ხელისუფლებაზე თავდასხმებს.