11 რეკომენდაცია, რომელიც თვითიზოლაციაში მყოფებმა უნდა გაითვალისწინონ

საქართველოში კორონავირუსის ინფექციის შემდგომი გავრცელების შესაკავებლად, 11 რეკომენდაცია შემუშავდა.

როგორც დავადებათა კონტროლისა და საზოგადოებრივი ჯანმრთელობის ეროვნულ ცენტრში გამართულ პრესკონფერენციაზე განაცხადეს, ეს რეკომენდაციები ეხებათ იმ ადამიანებს, რომლებიც თვითიზოლაციაში უნდა იყვნენ.

კერძოდ, ინფექციის მაღალი გავრცელების არეალიდან დაბრუნებულ ადამიანებს, აგრეთვე დადასტურებულ შემთხვევასთან ახლო კონტაქტში მყოფ პირებს.

ეს რეკომენდაციებია:

1. დარჩით სახლში და ის საჭიროებები, მაგალითად მედიკამენტების ყიდვა არა თქვენ, არამედ დამხმარე ადამიანებმა უზრუნველყონ.

2. შეზღუდეთ კონტაქტები თქვენთან ერთად მცხოვრებ ადამიანებთან და იყავით განცალკევებულ საძინებელში. ეცადეთ მაქსიმალურად იშვიათად გამოხვიდეთ ოთახიდან, გამოსვლისას კი აუცილებლად გამოიყენეთ ნიღაბი.

3. თუ იზოლაციაში მყოფ ადამიანს დასჭირდა სამედიცინო დახმარება, ის წინასწარ უნდა დაუკავშირდეს თავის პროვაიდერს, წინასწარ დაგეგმოს ვიზიტი ამა თუ იმ სამედიცინო დაწესებულებაში და იქ მისვლისას გამოიყენოს ნიღაბი.

4. გამოიყენეთ ნიღაბი განსაკუთრებით მაშინ, როდესაც გიწევთ საერთო სივრცეებში გასვლა თუნდაც ოჯახის სხვა წევრებთან.

5. ხველისა და ცემინების ეტიკეტი – ცხვირზე აიფარეთ ერთჯერადი ცხვირსახოცი და გამოყენების შემდეგ გადააგდეთ.

6. ცემინების, ხველის, ხელის დაბინძურების, საკვების მიღების, ტუალეტის გამოყენების შემდეგ, აუცილებლად დაიბანეთ ხელები საპნითა და გამდინარე წყლით.

7. არ გამოიყენოთ საზიარო საყოფაცხოვრებო საგნები სხვა ადამიანებთან ერთად. იზოლაციაში მყოფს უნდა ჰქონდეს თავისთვის გამოყოფილი თეფში, ჭიქა, ჩანგალი, კოვზი და ა.შ.

8. დააკვირდით ჯანმრთელობის მდგომარეობასა და სიმპტომებს. იმ შემთხვევაში, თუ ჯანმრთელობის მდგომარეობის გაუარესება შეიმჩნევა, სასწრაფოდ დაუკავშირდით საკონტაქტო პირებს.

9. ნუ მიიღებთ ამ პერიოდში სტუმრებს, თუ რაიმე სასწრაფოა, მაქსიმალურად უნდა ეცადოთ, მოახერხოთ სატელეფონო კონტაქტი.

10. თუ გყავთ შინაური ცხოველები, ეცადეთ მათთან კონტაქტი შეზღუდოთ ან თუ იძულებული ხართ, გქონდეთ კონტაქტი, აუცილებლად დაიბანეთ ხელი მანამდე და შემდეგ.

11. გამოყენებული ერთჯერადი ცხვირსახოცები, ნიღბები მოათავსეთ ცელოფნის პარკში, რომელსაც გადააკრავთ თავს, მოათავსეთ განმეორებით პარკში და გაანადგურეთ საერთო საყოფაცხოვრო ნარჩენებთან ერთად, ასეთ პარკში კი საკვების ნარჩენები არ მოათავსო.

საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე კი 29 თებერვალს დადასტურდა. 4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა.

ბოლო მონაცემებით, COVID-19-ს მსოფლიოს მასშტაბით 3220 ადამიანი ემსხვერპლა, 51,193 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.