პაატა იმნაძე: სამწუხაროდ, გვაქვს ინფორმაცია, რომ ზოგიერთები თვითიზოლაციის წესებს არ იცავენ

სამწუხაროდ, გვაქვს ინფორმაცია, რომ ზოგიერთები სარისკო მოგზაურობის ისტორიით, არ იცავენ თვითიზოლაციის წესებს, - ამის შესახებ დაავადებათა კონტროლის და საზოგადოებრივი ჯანმრთელობის ეროვნული ცენტრის“ გენერალური დირექტორის მოადგილემ, პაატა იმნაძემ „დღის ქრონიკაში“ ისაუბრა.

მისი თქმით, „ეს ადამიანები რისკს უქმნიან, არამარტო ოჯახის წევრების, ან თანამშრომლების, არამედ მთლიანად საზოგადოების ჯანმრთელობას“.

პაატა იმნაძის განცხადებით, ინფიცირებული პაციენტი, რომელიც იტალიიდან შემოვიდა, მაქსიმალურად იცავდა თვითიზოლაციის წესებს.

„ვინც იმოგზაურა მასთან ერთად, ნუ ინერვიულებენ, მის ახლო კონტაქტებს ჩვენ მოვნახავთ, უფრო მეტად მაწუხებს ის ადამიანები, რომლებიც ჩამოდიან, განსაკუთრებით იტალია გვაწუხებს, რადგან მგზავრთნაკადი 3-4 ჯერ მეტია, ვიდრე ჩინეთიდან. სამწუხაროდ, გვაქვს ინფორმაცია, რომ ზოგიერთები სარისკო მოგზაურობის ისტორიით, არ იცავენ თვითიზოლაციის წესებს. ეს ადამიანები რისკს უქმნიან, არამარტო ოჯახის წევრების, ან თანამშრომლების ჯანმრთელობას, არამედ მთლიანად საზოგადოებას“, - განაცხადა პაატა იმნაძემ.

საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე 29 თებერვალს, მეოთხე კი 5 მარტს დადასტურდა.

4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3220 ადამიანი ემსხვერპლა, 51,193 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.