ამირან გამყრელიძე: ყველამ, ვინც იტალიიდან ვბრუნდებით, გავითავისოთ დიდი სამოქალაქო პასუხისმგებლობა, გავიჭირვოთ და 14 დღე ვიყოთ თვითიზოლირებული

იმის გამო, რომ ჩინეთს გარეთ დღეს დაახლოებით, 15 ათასამდე კორონავირუსის დადასტურებული შემთხვევაა, პირველი ჩვენი რეკომენდაცია საქართველოს მოქალაქეებისადმი გახლავთ, რომ მაქსიმალურად შევზღუდოთ საერთაშორისო მოგზაურობები, თუ რა თქმა უნდა, ამის განსაკუთრებული აუცილებლობა არ არის, - ამის შესახებ დაავადებათა კონტროლის ცენტრის ხელმძღვანელმა, ამირან გამყრელიძემ საგანგებო ბრიფინგზე განაცხადა.

მისი თქმით, თუ ყველაზე მაღალი რისკის ქვეყნებში: ჩინეთში, სამხრეთ კორეაში, ირანსა და იტალიაში, ვინმე მიემგზავრება, აუცილებელია, ჩამოსვლის შემდეგ თვითიზოლაცია მოახდინონ.

„ყველამ, ვინც იტალიიდან ვბრუნდებით, გავითავისოთ დიდი სამოქალაქო პასუხისმგებლობა, გავიჭირვოთ და 14 დღე ვიყოთ თვითიზოლირებული. ჩვენ ვებ-გვერდზე გამოქვეყნებულია გაიდლაინები და უნდა მიყვეთა ამ პროტოკოლს. თუ არ გაქვთ თვითიზოლირების საშუალება, მაშინ აუცილებელია საკარანტინო სივრცეში განთავსება, რაც ქვეყანაში საკმაო რაოდენობისაა. მოთავსდებით ორგანიზებულ კარანტინში და იქ შესაბამისი მომსახურეობა გექნებათ. თუ თვითიზოლაციაში ხართ და 14 დღის განმავლობაში, განგივითარდებათ კორონავირუსისთვის დამახასიათებელი სიმპტომები, აუცილებელია დარეკოთ ექიმთან, ან ინფექციურ საავადმყოფოში, ან ჯანდაცვის სამინისტროს ცხელ ხაზზე და საგანგებო დახმარების დეპარტამენტში უზრუნველყოფს თქვენს ტრანსპორტირებას ინფექციურ საავადმყოფოში. თუ არავითარი სიმპტომები არ გაქვთ, 14 დღის შემდეგ თავისუფალი ხართ“ - განაცხადა ამირან გამყრელიძემ.

მისივე თქმით, ადამიანი გამოჯანმრთელებულად ითვლება, თუ მას კორონავირუსზე უარყოფითი რეაქცია 24 საათში, ზედიზედ ორჯერ ექნება.

„მსუბუქი შემთხვევების დროს, დაახლოებით ორი კვირიდან 20 დღემდე საჭიროა სტაციონალური იზოლირება, დაკვირვება და მკურნალობა. მსოფლიო ჯანდაცვის ორგანიზაციის სტანდარტით, გამოჯანმრთელებულად ითვლება ადამიანი, თუ ორჯერ ზედიზედ 24 სათში, მას კორონავირუსზე უარყოფითი რეაქცია ექნება“,-განმარტა გამყრელიძემ.

ცოტა ხნის წინ ცნობილი გახდა, რომ საქართველოში კორონავირუსის 5 ახალი შემთხვევა გამოვლინდა. ამ დროისთვის უკვე ჯამში 9 შემთხვევაა დადასტურებული. საქართველოს მთავრობის მიერ შექმნილ სპეციალური ვებგვერდის თანახმად, კარანტინის რეჟიმშია 162 ადამიანი, ხოლო სტაციონარში მეთვალყურეობის ქვეშ – 45.

საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე 29 თებერვალს, მეოთხე კი 5 მარტს დადასტურდა.

4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3220 ადამიანი ემსხვერპლა, 51,193 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.