ალექსანდრე ხვთისიაშვილი: უახლოეს დღეებში იტალიიდან საქართველოს 95 მოქალაქეს ჩამოვიყვანთ

„იტალიიდან მოქალაქეების დაბრუნება მოხდება თვითმფრინავით. დიდი ალბათობით ქალაქ რომიდან. ჩვენ ვმუშაობთ ეკონომიკის და ჯანდაცვის სამინისტროსთან, ავიაციის დეპარტამენტთან და ავიაციიის სააგენტოსათან. რომ რაც შეიძლება მალე გაიგზავნოს თვითმფრინავი, რათა ჩვენი მოქალაქეები ჩამოვიყვანოთ. დღევანდელი მდგომარეობით 95-მა ადამიანმა წარმოადგინა შესაბამისი დოკუმენტაცია იმეილზე. მოხდა მათთან დაკავშირება“, - ამის შესახებ ალექსანდრე ხვთისიაშვილმა „ქრონიკასთან“ საუბარში განაცხადა.

მისი თქმით, იტალიაში საელჩოს ყველა თანამშრომელი 24 საათიან განსაკუთრებულ რეჟიმში მუშაობს იტალიაში მყოფ ქართველებთან. „დაემატა რამდენიმე ცხელი ხაზი. მოხდა სპეციალური იმეილის შექმნა და გავრცელდა განცხადება, რომ საქართველოს მოქლაქეებმა, რომლებსაც უახლოესი ორი კვირის წინ ჰქონდათ შეძენილი ან დაჯავშნილი ბილეთები მიმართონ საქართველოს საკონსულოს რომში, რათა მოხდეს ყველა იმ პირის იდენტიფიცირება და შემდეგ იმ ადამიანების საქართველოში დაბრუნება.

მიუხედავად იმისა, რომ 95 ადამიანთან მოხდა კომუნიკაცია ჩვენ დღეს დილით შევიტყვეთ, რომ სოციალური ქსელით ეს ადამიანები, რომლებიც დარჩნენ იტალიაში რეისების გაუქმების გამო, გამოხატავენ შიშს რომ არ მიხედავთ მათ სახელმწიფო და მთავრობა. კიდევ ერთხელ შევახსენებ, რომ მეილზე როგორც კი მოდის ინფორმაცია მათ უკავშირდებიან საელჩოდან და უახლოეს პერიოდში მათთან მოხდება კომუნიკაცია. ეს 95 ადამიანი არის კონტროლის ქვეშ. საქართველოს მთავრობა ყველას მიაქცევს ყურადღებას“, - აღნიშნა ხვთისიაშვილმა.

რაც შეეხება ირანს, ხვთისიაშვილის თქმით, ამ ქვეყანაში საქართველოს საელჩოს და საკონსულოს აქვს კომუნიკაცია ჩვენი ქვეყნის მოქალაქეებთან. „ამ ქვეყანაშიც არის საკონსულოს და საელჩოს ცხელი ხაზი, რომელზეც რეკავენ ჩვენი მოქალაქეები. რამდენიმე დღის წინ ჩამოვიყვანეთ ჩვენი მოქალაქეები აზერბაიჯანის გავლით ირანიდან. ჩვენ შევათანხმეთ აზერბაიჯანთან სახმელეთო დერეფანი, რომლითაც საქართველოს 30 მოქალაქის გადმოყვანა მოხდა ირან-აზერბაიჯანის საზღვრიდან. 35-კაციანი სიიდან 5-მა მოქალაქემ უარი განაცხადა და დარჩა ირანში“, - აღნიშნა მინისტრის მოადგილემ.

მისი თქმით, ირანში კვლავ რჩებიან საქართველოს მოქალაქეები, რომელთა ნაწილი გამოხატავს ამ ქვეყანაში დარჩენის სურვილს. „თუმცა არიან ადამიანები, ვისაც საქართველოში დაბრუნება უნდა. ასეთი დერეფანი შეთანხმებული გვაქვს სომხეთთან და არ არის გამორიცხული, მოქალაქეები სამშობლოში სომხეთის გავლით დავაბრუნოთ“, - აღნიშნა ხვთისიაშვილმა.

საზღვარზე საქართველოსა და უცხო ქვეყნის მოქალაქეებისთვის შეზღუდვები დაწესდა და იტალიასთან პირდაპირი ფრენები დროებით შეჩერდა.

ეპიდემიური რისკის მქონე ქვეყნებიდან ჩამოსული მგზავრებისთვის დღეიდან 14-დღიანი კარანტინი სავალდებულოა.

საქართველოში კორონავირუსით ინფიცირების 12 შემთხვევაა დადასტურებული, კარანტინის რეჟიმშია 140 ადამიანი, ხოლო სტაციონარში მეთვალყურეობის ქვეშ – 42. პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3491 ადამიანი ემსხვერპლა, 57389 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.