მიხეილ ჩხენკელი: ქუთაისის საერთაშორისო უნივერსიტეტი არის ჭეშმარიტად ევროპული, მსოფლიო სტანდარტების მქონე უმაღლესი სასწავლებელი

მიხეილ ჩხენკელმა „იმედის“ გადაცემა SWOT-ანალიზში ქუთაისი საერთაშორისო უნივერსიტეტის უნიკალურობაზე ისაუბრა. განათლების, მეცნიერების, კულტურის და სპორტის მინისტრის თქმით, პროექტის განხორციელება შეუძლებელი იქნებოდა ბიძინა ივანიშვილის და „ქართუ ფონდის“ დახმარების გარეშე, რომელმაც მილიარდი ევროს ოდენობის ინვესტიცია ჩადო.

„ქუთაისის საერთაშორისო უნივერსიტეტი არის ჭეშმარიტად ევროპული, მსოფლიო სტანდარტების მქონე უმაღლესი სასწავლებელი. და ძალიან სასიხარულოა, რომ პირველ სტუდენტებს ქუთაისის საერთაშორისო უნივერსიტეტი მიიღებს წელს, სექტემბერში 3 სპეციალობაზე: მათემატიკაში, კომპიუტერულ მეცნიერებაზე და მენეჯმენტში. ეს მართლაც უნიკალური უნივერსიტეტია და ამ მასშტაბის და ამ დონის უნივერსიტეტი ვერ დაფუძნდებოდა საქართველოში რომ არა ბატონი ბიძინა ივანიშვილის და მისი ოჯახის უაღრესად მნიშვნელოვანი ქველმოქმედება ამ საშვილიშვილო პროექტში“, - აღნიშნა მინისტრმა.

მისი თქმით, უნივერსიტეტის უნიკალურობას რამდენიმე საბაბი აქვს. მათ შორის ის, რომ აღნიშნული 3 მიმართულების პროგრამა მსოფლიოს ერთ-ერთ წამყვან მიუნჰენის ტექნიკურ უნივერსიტეტთან თანამშრომლობის ბაზაზე შემუშავდა. ამასთან, ეს ერთადერთი სახელმწიფო უნივერსიტეტია, სადაც სწავლება როგორც ქართული, ასევე ინგლისურ ენაზე წარიმართება. ეს ტენდენცია მომავალი პროგრამის შემუშავების დროსაც შენარჩუნდება, ლექციებს კი ადგილობრივ პროფესორებთან ერთად უცხოელი სპეციალისტები წაიკითხავენ.

„უცხოელი პროფესორებისთვის ორი მეთოდი იქნება გამოყენებული. ერთი ტრადიციული მეთოდი - აუდიტორიაში, ქუთაისში წაიკითხავენ ლექციებს და მეორე გახლავთ ის, რომ როგორც მოგეხსენებათ, ძალიან ცნობილი პროფესორებს ხშირად არ ექნებათ საშუალება ჩამოვიდნენ ქუთაისში, მაგრამ მათ საშუალება ექნებათ თავიანთი ქვეყნიდან დისტანციური მეთოდის გამოყენებით, ონლაინ წაიკითხონ ლექცია ქუთაისის საერთაშორისო უნივერსიტეტის სტუდენტებისთვის“, - განაცხადა ჩხენკელმა.

მან ასევე ხაზი გაუსვა ადრონული თერაპიის ცენტრის პროექტს, რომელიც უნივერსიტეტის ნაწილია და სადაც სიმსივნის მკურნალობასთან დაკავშირებით ჩატარდება სამუშაოები.

„ქართუ ფონდმა“ შეისყიდა 2 ციკლოტრონი, ეს არის დამაჩქარებელი. მთლიანად ამ პროექტის ღირებულებაა 40 მილიონი ევრო. ერთი ციკლოტრონი მოხმარდება სიმსივნის მკურნალობას ულტრათანამედროვე მეთოდების გამოყენებით. ეს არის ე.წ. პროტონული თერაპია, ხოლო მეორე ციკლოტრონი იქნება მთლიანად დათმობილი სამეცნიერო კვლევითი პროცესისთვის. ეს მართლაც უნიკალურს ხდის ამ ცენტრს და ჩვენ უკვე გვყავს პარტნიორები, რომლებიც დიდი ინტერესით ჩაერთვებიან ამ ცენტრის მოღვაწეობაში“< - აღნიშნა მინისტრმა.