საკონსტიტუციო სასამართლომ კომენდანტის საათის არაკონსტიტუციურად ცნობის შესახებ „გირჩის“ სარჩელის განხილვა დაიწყო

საკონსტიტუციო სასამართლომ დაიწყო „გირჩის“ სარჩელის განხილვა, რომელიც კომენდანტის საათის არაკონსტიტუციურად ცნობას ითხოვს. ინფორმაცია ამის შესახებ სასამართლოს ვებგვერდზე გამოქვეყნდა.

როგორც სასამართლოს განცხადებაშია აღნიშნული, არსებითად განიხილება საქმე „მიხეილ სამნიძე საქართველოს მთავრობის წინააღმდეგ“ (კონსტიტუციური სარჩელი №1499). განსახილველ საქმეში სადავოდ გამხდარი ნორმის თანახმად, საგანგებო მდგომარეობის ვადით იკრძალება 21:00 საათიდან 06:00 საათამდე პირთა ნებისმიერი ფორმით გადაადგილება.

„მოსარჩელის მითითებით, სადავო ნორმა ზღუდავს პირთა მიმოსვლის თავისუფლებას ისე, რომ დაცული არ არის ამ უფლებაში ჩარევის საქართველოს კონსტიტუციით გათვალისწინებული ფორმალური მოთხოვნები. მოსარჩელის განმარტებით, მიმოსვლის თავისუფლებაში ჩარევა დასაშვებია მხოლოდ კანონის საფუძველზე, ხოლო საგანგებო მდგომარეობის დროს - საქართველოს პრეზიდენტის მიერ გამოცემული დეკრეტით, თუმცა მოცემულ შემთხვევაში, საქართველოს პრეზიდენტის მიერ გამოცემული დეკრეტი არ განსაზღვრავს კონკრეტულ რეგულაციებს და კონსტიტუციური უფლებების შეზღუდვის სრულ უფლებამოსილებას გადასცემს საქართველოს მთავრობას. ამ პირობებში, საქართველოს მთავრობის მიერ მიმოსვლის თავისუფლების შეზღუდვა კი იწვევს საქართველოს კონსტიტუციის ფორმალური მოთხოვნების დარღვევას.

მოსარჩელე ასევე მიუთითებს, რომ გარკვეულ პერიოდში პირთა ნებისმიერი ფორმით გადაადგილების აკრძალვა ლეგიტიმური მიზნების მიღწევის აშკარად არათანაზომიერი საშუალებაა და შესაძლებელი იყო შემუშავებულიყო უსაფრთხო გადაადგილების სპეციალური წესები და გადაადგილება მომხდარიყო ვირუსის გავრცელების პრევენციისათვის აუცილებელი დამცავი საშუალებების გამოყენებით. ამასთან, მოსარჩელის პოზიციით დღის იმ მონაკვეთის შემცირება, რომლის განმავლობაშიც პირებს გარეთ გასვლა შეუძლიათ, ავტომატურად ზრდის რისკს, რომ ერთსა და იმავე დროს გარეთ უფრო მეტი ადამიანი მოიყრის თავს და გაიზრდება მათი კონტაქტის ალბათობა.

ყოველივე აღნიშნულიდან გამომდინარე, მოსარჩელე მიიჩნევს, რომ სადავო ნორმა არღვევს საქართველოს კონსტიტუციის მე-14 მუხლის პირველი და მე-2 პუნქტებით განმტკიცებულ მიმოსვლის თავისუფლებას. საქმეს არსებითად განიხილავს საქართველოს საკონსტიტუციო სასამართლოს პირველი კოლეგია“, - აღნიშნულია განცხადებაში.

საერთო ჯამში საკონსტიტუციო სასამართლოში საგანგებო მდგომარეობასთან დაკავშირებით „გირჩმა“ სამი სარჩელი შეიტანა. ბოლნისსა და მარნეულში საკარანტინო რეჟიმის შემოღებასთან დაკავშირებით სასამართლომ სარჩელი წარმოებაში მიიღო, მსუბუქ ავტომანქანაში 3-ზე მეტი ადამიანის ყოფნის აკრძალვასთან დაკავშირებული სარჩელი კი - არა.