TTG: „სტუმარი ღვთისაა“, ამბობენ ქართველები და შესაბამისადაც იქცევიან

„საქართველოს უკვე აქვს გეგმა, როგორ გაიხსნას უცხოელი ტურისტებისთვის“, - სტატიას ამ სათაურით ჩეხური ტურისტული ბიზნეს პორტალი TTG საქართველოს აქვეყნებს.

„საქართველო ულამაზესი ქვეყანაა ევროპისა და აზიის გასაყარზე. ეს ერთ-ერთი პირველი სახელმწიფო იქნება, რომელიც კორონავირუსის შემდეგ უცხოელი ტურისტებისათვის გაიხსნება. ადგილობრივი ტურისტული სერვისები ფუნქციონირებას უკვე 15 ივნისიდან დაიწყებენ და უცხოელ ტურისტებს 1-ლი ივლისიდან მიიღებენ“, - წერს სტატიის ავტორი ტომაშ ნოჰეილი.

ის ასევე იმ შეღავათებზე წერს, რომლებიც მთავრობამ მოსახლეობას პანდემიის პირობებში დაუწესა და აღნიშნავს, რომ საქართველოში კორონავირუსის სტატისტიკა ერთ-ერთი ყველაზე დაბალია ევროპაში.

„2020 წლის სექტემბერში, საქართველოში, UNWTO-ს პატრონაჟით, ტურიზმის სამომავლო პერსპექტივებზე რამდენიმე ათეული ქვეყნის მინისტრის შეხვედრა შედგება. UNWTO-ს გენერალური მდივანი ზურაბ პოლოლიკაშვილი ტურიზმის გამოცოცხლების მიზნით ანტიკრიზისულ გეგმებს მიესალმა, რომელიც საქართველოს მთავრობამ წარმოადგინა. ვიდეოკონფერენციის დროს, გენერალურმა მდივანმა დადებითად შეაფასა ქვეყნის გამოცდილება კორონავირუსთან ბრძოლაში, მოქალაქეების მიმართ აღმოჩენილი მომსახურებები საკარანტინო ზონებსა და მწვანე ზონების გამოყოფა ტურისტულ კურორტებზე - აღნიშნული კონკურენტუნარიანობის სარგებელი აუცილებლად წაადგება საქართველოს“, განაცხადა ზურაბ პოლოლიკაშვილმა“, - წერს ავტორი.

მისივე თქმით, ქვეყანაში შეიქმნება მწვანე ზონები, სასტუმროები და სხვა სახის ტურისტული ინფრასტრუქტურა სპეციალური გაიდლაინების მიხედვით ამოქმედდება.

„საქართველოში შეიქმნება მწვანე, საკურორტო ზონები, რომელიც როგორც პროექტი დამოუკიდებლად განხორციელდება, გარდა ამისა, ჩვენ ძალიან აქტიურად ვმუშაობთ საერთო ეროვნულ გაიდლაინებზე, წესებზე, რომლებიც განკუთვნილი იქნება ტურიზმის ყველა ინდუსტრიისთვის და დაინერგება სექტორულად - ეს იქნება სასტუმროები, განთავსების, კვების ობიექტები, გიდები, სატრანსპორტო და ტურისტული კომპანიები. უსაფრთხოება ჩვენთვის პირველ ადგილზეა და ამიტომ მნიშვნელოვანია, რომ განთავსების და კვების ობიექტები შეესაბამებოდნენ საერთაშორისო სტანდარტებს“, - განაცხადა საქართველოს ტურიზმის ეროვნული ადმინისტრაციის ხელმძღვანელმა, მარიამ ქვრივიშვილმა.

ადგილობრივი უწყებები უახლოეს დღეებში, დაიწყებენ ობიექტების სერტიფიცირებებს, რომლებიც პირველად შიდა მოგზაურებისთვის, 1-ლი ივლისიდან კი უცხოელი სტუმრებისთვის გაიხსნება.

„საუკეთესო, რაც საქართველოს გააჩნია, არიან ქართველები. ეს არის მისი საგანძური“, განაცხადა ტალებ რიფაიმ, გაეროს მსოფლიო ტურიზმის ორგანიზაციის ყოფილმა გენერალურმა მდივანმა. მისი თქმით, თავიდან ეს ფრაზა თავაზიანი გამონათქვამი ეგონა, მაგრამ საქართველოში ყოფნის დროს დარწმუნდა, რომ ეს სრული სიმართლეა. „სტუმარი ღვთისაა“, ამბობენ ქართველები და შესაბამისადაც იქცევიან. მსოფლიოში ერთ-ერთი უდიდესი ეკონომიკური პლატფორმის Numbeo-ს შეფასებით, საქართველო ყველაზე უსაფრთხო ქვეყნების სიაში შევიდა“, - აცხადებს სტატიის ავტორი ტომაშ ნოჰეილი.