აშშ-ის თავდაცვის მდივნის მოადგილე და პენტაგონის წარმომადგენლები საქართველოს დამოუკიდებლობის დღეს ულოცავენ

ამერიკის შეერთებული შტატების თავდაცვის დეპარტამენტი ს წარმომადგენლები საქართველოს დამოუკიდებლობის დღეს ულოცავენ. ინფორმაციას საგარეო საქმეთა სამინისტრო ავრცელებს.

თავდაცვის მდივნის მოადგილე, დევიდ ნორქუისტი მილოცვაში აღნიშნავს, რომ მათი ერისთვის საქართველოსთან მეგობრობა და პარტნიორობა დიდი პატივია.

„დ ღეს აღინიშნება თანამედროვე ქართული სახელწიფოს დაფუძნების დღე. ამ ისტორიული მოვლენიდან 102 წლისთავზე, საქართველომ, თავისი ხალხის სიმამაცით, შეუპოვრობითა და სიმტკიცით, თანმიმდევრულად გადალახა გამოწვევები და დაამკვიდრა თავისუფლების საფუძვლები. ჩვენი ერისთვის პატივია, რომ საქართველო მისი მეგობარი და პარტნიორია. აშშ-ის თავდაცვის დეპარტამენტის სახელით მინდა გულთბილი მილოცვა გამოვხატო ქართველი ხალხის მიმართ. გილოცავთ დამოუკიდებლობის დღეს“, - ამბობს ნორქუისტი.

თავდაცვის დეპარტამენტის წარმომადგენლის, ქეთრინ ვილბარგერის თქმით, დეპარტამენტი მიესალმება საქართველოს ძალისხმევას.

„დღეს, როდესაც ვზეიმობთ საქართველოს დამოუკიდებლობას, აშშ-ის თავდაცვის დეპარტამენტი მიესალმება თქვენს ძალისხმევას თავისუფლების, თვითმმართველობისა და დემოკრატიის გაძლიერებისთვის. ჩვენ ვიზიარებთ ამ ღირებულებებს და ვამაყობთ ერთობლივი მიღწევებით. დაე, თქვენმა ერმა და ჩვენმა პარტნიორობამ გააგრძელოს წინსვლა მომავალ წლებშიც. გილოცავთ დამოუკიდებლობის დღეს“, - აცხადებს ვილბარგერი.

დეპარტამენტის კიდევ ერთი წარმომადგენელი ლაურა კუპერი აღნიშნავს, რომ მისთვის ბოლო რამდენიმე წლის განმავლობაში საქართველოს თავდაცვის სამინისტროსთან მუშაობა დიდი პატივია.

„ჩემთვის დიდი პატივია, რომ მაქვს შესაძლებლობა აშშ-ის თავდაცვის დეპარტამენტის სახელით გამოვხატო თქვენდამი პატივისცემა. გთხოვთ, მიიღოთ როგორც ჩემი გულთბილი მილოცვა ამ მნიშვნელოვან დღესთან დაკავშირებით, ასევე საუკეთესო სურვილები მშვიდობიანი, თავისუფალი, წარმატებული მომავლისთვის“, - ამბობს კუპერი.

აშშ-ის თავდაცვის ატაშე სტეფანი ბაგლი საქართველოს მადლობას უხდის მსოფლიოში მშვიდობისა და სტაბილურობისთვის შეტანილი წვლილისთვის.

​„საქართველოში მყოფი აშშ-ის თავდაცვის გუნდის სახელით, მინდა, ქართველ ხალხს მივულოცო საქართველოს დამოუკიდებლობის 102-ე წლისთავი. მიუხედავად იმისა, რომ წელს ვერ შეძლებთ დამოუკიდებლობის დღის წესისამებრ საზეიმოდ აღნიშვნას, ვიმედოვნებ, რომ მაინც დატკბებით ამ მომენტით. მინდა, მადლობა გადაგიხადოთ თქვენი მეგობრობის, თანამშრომლობის და უმთავრესად, მსოფლიოში მშვიდობისა და სტაბილურობისთვის შეტანილი წვლილისთვის. საქართველო, გილოცავთ დამოუკიდებლობის დღეს!“, – აღნიშნავს სტეფანი ბაგლი.

26 მაისი საქართველოს დამოუკიდებლობის დღეა. ზუსტად 102 წლის წინ, 1918 წლის 26 მაისს, თბილისში საქართველოს ეროვნულმა საბჭომ სახელმწიფოებრივი დამოუკიდებლობის აქტი მიიღო.