მომხმარებლის მიერ დაბრუნებულ ტანსაცმელს დახლზე მოხვედრამდე დეზინფექცია ჩაუტარდება

კომპანია „რითეილ გრუპ ჯორჯიას“ დირექტორის, რეზო მაღალაშვილის განცხადებით, იქიდან გამომდინარე, რომ ტანსაცმლის მაღაზიებში გასახდელები არ იქნება, მომხმარებელი წაიღებს პროდუქციას სახლში და თუ ვერ მოირგებს და გადაწყვეტს დაბრუნებას ან გადაცვლას, მოიტანს მაღაზიაში. მისივე თქმით, ასეთი პროდუქცია პირდაპირ დარბაზში კი არ დაბრუნდება, არამედ წავა სპეციალურ სივრცეში, სადაც ჩაუტარდება სტერილიზაცია, დეზინფექცია და მხოლოდ 48 საათში დაბრუნდება დარბაზში.

„ჩვენ ვართ საერთაშორისო კომპანია, 11 ქვეყანაში ვართ წარმოდგენილი, საიდანაც ცხრაში უკვე გაიხსნა ჩვენი მაღაზიები. გარდა იმ რეკომენდაციებისა და რეგულაციებისა, რაც მივიღეთ მთავრობისგან, ასევე ვმოქმედებთ იმ პროტოკოლით, რაც მივიღეთ სხვა ქვეყნებში მიღებული გამოცდილებიდან. ერთ-ერთი ძალიან ეფექტური გამოდგა გასახდელების დროებით გაუქმება, რადგან გასახდელები ითვლება შედარებით მაღალი რისკის მქონედ. შესაბამისად, გადავწყვიტეთ, რომ ეს რისკიც შეგვემცირებინა, რადგან უპირველესია ტანამშრომლებისა და მომხმარებლების უსაფრთხოება. ვენტილაცია და ყველა ის მოთხოვნა, რომელიც ჯანდაცვას აქვს, ეს ყველაფერი შესრულებულია. ეს არ ნიშნავს, რომ აღნიშნული რეგულაცია სახელმწიფოს არ ექნება, საბოლოო რეგულაციები, როგორც ვიცი, არ არის მზად, ვინაიდან ჩვენ არ ვიცით თარიღი, როდის გავიხსნებით. იმედი გვაქვს, რომ ჩვენი ეს ინიციატივა ასევე დაეხმარება სახელმწიფოს ამ რეგულაციების საბოლოოდ ჩამოყალიბებაში“, - აღნიშნავს რეზო მაღალაშვილი.

მისივე თქმით, იქიდან გამომდინარე, რომ გასახდელები არ იქნება, მომხმარებელი წაიღებს ამ პროდუქციას სახლში და თუ ის ვერ მოირგებს და გადაწყვეტს დაბრუნებას ან გადაცვლას, მოიტანს მაღაზიაში.

„გადაცვლისთვის და დაბრუნებისთვის მომხმარებელს ორი კვირა ექნება. ეს პროდუქცია პირდაპირ დარბაზში კი არ დაბრუნდება, არამედ წავა სპეციალურ სივრცეში, სადაც ჩაუტარდება სტერილიზაცია, დეზინფექცია და მხოლოდ 48 საათში დაბრუნდება დარბაზში. ეს პრაქტიკა გვაქვს უკვე რამდენიმე ქვეყანაში და ის კარგად მუშაობს. დეზინფექციის რამდენიმე მეთოდი არსებობს, მათ შორის ცხელი ორთქლითა და ხსნარებით დამუშავება. თუ იქნება ჯანდაცვის სამინისტროდან კონკრეტული მითითება, ამის შესაბამისად მოვიქცევით, თუ არადა ჩვენი პროტოკოლით, სავარაუდოდ, ცხელი ორთქლით. ეს არ დააზიანებს ტანსაცმელს, ცხელი ორთქლით ისედაც ხდება ხოლმე დაუთოვება ტანისამოსის. ამ შემთხვევაში უფრო ინტენსიურად, უფრო დიდხანს გაგრძელდება, პლუს 48 საათი შეინახება ცალკე სივრცეში. რაც შეეხება გახსნის თარიღს, ის ჯერ ცნობილი არ არის“, - აღნიშნავს მაღალაშვილი.