გიგა ბოკერია: თქვენ უფრო ჭკვიანები რატომ ხართ, ვიდრე ის, ვინც თვითონ უნდა წყვეტდეს, როდის დახარჯოს თავისი ფული

თქვენ უფრო ჭკვიანები რატომ ხართ, ვიდრე ის ხალხი, ვინც თვითონ უნდა წყვეტდნენ, როდის უნდა დახარჯონ თავისი ფული? თქვენ თუ „შავი დღე“ ახლა არ გიდგათ, იმ ხალხს უდგას, - ამის შესახებ საგაზაფხულო სესიის პლენარულ სხდომაზე სიტყვით გამოსვლისას „ევროპული საქართველოს“ ერთ-ერთმა ლიდერმა, გიგა ბოკერიამ განაცხადა.

„გუშინ თქვენ უტიფრად ამბობდით, რომ საგადასახადო ტვირთით და სახელმწიფო ზომით მეორე-მესამე ადგილზე ვართ. ვინ მოგაწოდათ ეს მონაცემები? Heritage Foundation-ის მონაცემებით, საგადასახადო ტვირთით ჩვენ 118-ე ადგილზე ვართ, თუ ყველა გადასახადს ავიღებთ. ვინ მოგატყუათ? ამდენი ქვეყანაა ჩვენზე წინ. ყველა ადამიანს მათ მიერ შექმნილი 100 ლარიდან თქვენ თითქმის 24 ლარს ართმევთ. ჩვენი ზომის ქვეყნები რომ ავიღოთ, 14 ქვეყნიდან მე-8 ადგილზე ვართ, სომხეთიც გვისწრებს, ალბანეთიც და ბევრი სხვა ქვეყანაც. თუმცა, ეს რომ გვერდზე გადავდოთ და თქვენ ნაწილობრივ მართალი იყოთ, ასეთი გასაჭირის დროს არ უნდა შეუმსუბუქოთ ტვირთი ხალხს? რატომ გგონიათ, რომ უკეთ იცით, რაზე უნდა დაიხარჯოს ფული ბიზნესში, ვიდრე საბაზრო ეკონომიკამ და მოქალაქეებმა? უმარტივესი გზა არის გადასახადების დაწევა, მაგრამ ალბათ დაფიცებული გაქვთ ხატზე, რომ თქვენ უფრო ბრძენები ხართ. იგივე უნდა ვთქვა საპენსიო ფონდზე. თქვენ უფრო ჭკვიანები რატომ ხართ, ვიდრე ის ხალხი, ვინც თვითონ უნდა წყვეტდნენ, როდის უნდა დახარჯონ თავისი ფული? თქვენ თუ „შავი დღე“ ახლა არ გიდგათ, იმ ხალხს უდგას. რა პოლიტიკური უტიფრობაა, რომ ასეთი გაჭირვების დროს ხალხს არ აძლევთ მათ ფულს და ეუბნებით, რომ მათზე ჭკვიანები ხართ“, - განაცხადა ბოკერიამ.