„ევროპული საქართველო“ მოსახლეობისთვის საპენსიო ფონდში აკუმულირებული ფულის გადაცემის ინიციატივით გამოდის

„ევროპული საქართველო“ ხელისუფლებას მოუწოდებს, რომ მოსახლეობას საპენსიო ფონდში აკუმულირებული თანხა გადასცეს. „შავი დღისთვის“ გროვდებოდა და სწორედ ახლა არის ეს „შავი დღე“, როდესაც ხალხს თავისი ფული სჭირდება“, - ამის შესახებ პარტიის ერთ-ერთმა ლიდერმა გიგა ბოკერიამ მედიისთვის გამართულ ბრიფინგზე განაცხადა.

მისივე თქმით, იმ შემთხვევაში, თუ ხელისუფლება ამ თანხით მოსახლეობის დახმარებას გადაწყვეტს, მოქალაქეებს 483.6 მილიონი ლარი დაუბრუნდებათ, ხოლო მეწარმეებს - 166 მილიონი ლარი.

„ევროპული საქართველო“ გამოვდივართ კონკრეტული შეთავაზებით, ფულის კონკრეტული წყაროთი, საიდან უნდა მოხდეს მოქალაქეებისთვის დახმარების გაწევა თუნდაც მცირედით, მაგრამ სწრაფად. ეს არის ის ფული, რომელიც ეკუთვნის ყველა დამსაქმებელსა და დასაქმებულს, ჩვენი ფული. ის ფული, რომელიც ამ 1 წლის განმავლობაში აკრეფილია ე.წ. საპენსიო გადასახადით. ეს ფული ახლა დევს და იდეაში, ის იყო სიბერისთვის, „შავი დღისთვის“ გადადებული ფული. ახლა არის ეს “შავი დღე“ და ახლა სჭირდება ამ ხალხს ეს ფული. ამ ყველაფრის შედეგად, მოქალაქეებს დაუბრუნდებათ 480 მილიონ ლარზე მეტი და მეწარმეებს - 170 მილიონ ლარამდე. ერთ მოქალაქეს საშუალოდ 600 ლარამდე დაუბრუნდება , ხოლო თითოეულ დამსაქმებელს ყოველ დასაქმებულზე - საშუალოდ 223 ლარი“, - განაცხადა ბოკერიამ.

„ევროპული საქართველოს“ პარტიის წევრები აცხადებენ, რომ მთავრობამ საპენსიო ფონდში დარჩენის ან ფონდიდან გასვლის არჩევანი მოქალაქეებს ხელახლა უნდა მისცეს და ამისათვის ერთთვიანი ვადა - 1-ლი აპრილიდან 1-ელ მაისამდე - უნდა განისაზღვროს.

2019 წლის პირველი იანვრიდან საქართველოში დაგროვებითი საპენსიო სისტემა ამოქმედდა.

როგორ შეუძლია 40 წელს გადაცილებულ მოქალაქეს საპენსიო სისტემიდან გასვლა. ინსტრუქცია - წაიკითხეთ ამ ბმულზე.

ბოლო მონაცემებით, კორონავირუსი ქვეყანაში უკვე 67 ადამიანს დაუდასტურდა. მათგან სულ გამოჯანმრთელდა 9 პაციენტი. ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

რა უნდა ვიცოდეთ საგანგებო მდგომარეობის შესახებ, წაიკითხეთ აქ.