ამტვერებადი და აალებადი, ასევე ნიადაგის დამაბინძურებელი მასალების წარმოება, დამუშავება-რეალიზაციის ადგილებს მერია განსაზღვრავს

პარლამენტმა მიიღო კანონი, რომლის მიხედვითაც, მუნიციპალიტეტს მიენიჭა უფლებამოსილება, განსაზღვროს ის ადგილები, თუ სად შეიძლება ამტვერებადი და აალებადი, ასევე ნიადაგის დამაბინძურებელი მასალების წარმოება, დამუშავება, რეალიზაცია-განთავსება. ისევე, როგორც ამ ადგილებში განსაზღვროს აღნიშნული ქმედებების განხორციელების წესი და ფორმები, - ამის შესახებ დედაქალაქის მთავრობის სხდომაზე თბილისის მერმა, კახა კალაძემ განაცხადა.

„ჰაერის დაბინძურების განმაპირობებელი ორი მთავარი ფაქტორი ტრანსპორტი და სხვა ამტვერებადი მასალების უსისტემო მიმოქცევაა, რომელიც ჩვენს დედაქალაქში სერიოზულ პრობლემას წარმოადგენს. დაახლოებით, ერთი წლის წინ საქართველოს პარლამენტს წარვუდგინეთ საკანონმდებლო წინადადებათა პაკეტი, რომლითაც მუნიციპალიტეტი აღნიშნული პრობლემის მოგვარებას და გარკვეულ სისტემაში მოქცევას დაიწყებს. პარლამენტმა აღნიშნული კანონი უკვე მიიღო, რომლის მიხედვითაც, მუნიციპალიტეტს მიენიჭა უფლებამოსილება, განსაზღვროს ის ადგილები, თუ სად შეიძლება ამტვერებადი და აალებადი, ასევე ნიადაგის დამაბინძურებელი მასალების წარმოება, დამუშავება, რეალიზაცია-განთავსება. ისევე, როგორც ამ ადგილებში განსაზღვროს აღნიშნული ქმედებების განხორციელების წესი და ფორმები. კანონი უკვე ამოქმედდა, რომლის საფუძველზეც, თბილისის საკრებულომ დაამტკიცა შესაბამისი წესი, რომელიც 2021 წლის პირველი იანვრიდან შედის ძალაში, რაც იმას ნიშნავს, რომ ისეთ ადგილებში, სადაც მუნიციპალიტეტი მსგავსი ტიპის საქონლის დამუშავება/გადამუშავებას, განთავსებას თუ რეალიზაციას დაუშვებს, განისაზღვრება სპეციალური, ე.წ. დახურული წესი, რათა ჰაერში მათი გაფრქვევა არ მოხდეს. აღნიშნული წესის აღსრულება უკვე მეწარმეებს პირველი იანვრიდან მოუწევთ. ეს ეხება ე.წ. ელიავას ბაზრობას და მიმდებარე ტერიტორიას, ასევე, სხვა ნებისმიერ ადგილს, სადაც მსგავსი პროდუქციის წარმოება და რეალიზაცია ხდება“, - განაცხადა დედაქალაქის მერმა.

მისივე თქმით, კრიტიკულად მნიშვნელოვანია, რომ მეწარმეებს წინასწარ ჰქონდეთ ინფორმაცია აღნიშნულ შეზღუდვებთან დაკავშირებით და დაიწყონ შესაბამისი მზადება, ვინაიდან, 2021 წლის პირველი იანვრიდან მუნიციპალიტეტის მიერ დადგენილი წესის დარღვევით, აღნიშნული საქმიანობის განხორციელება გამოიწვევს დაჯარიმებას, რაც სამეწარმეო საქმიანობის განმახორციელებელი პირებისთვის მძიმე ტვირთი იქნება.

„ამიტომ, ჩვენ დროულად უნდა მოვახდინოთ მათი ინფორმირება და მომავალი წლის პირველი იანვრიდან შევცვალოთ არსებული მავნე პრაქტიკა, რომელიც საკმაოდ დამაზიანებელი და შემაწუხებელია არა მხოლოდ მიმდებარედ დასახლებული მოქალაქეებისთვის, არამედ მთლიანად ქალაქისთვის. ეს ეხება სამშენებლო, სარემონტო მასალებს, საბურავებს თუ სხვა აალებად ნივთიერებებს. მუნიციპალიტეტმა განსაზღვრა ადგილები, თუ სად შეიძლება მსგავსი ტიპის საქონლით ვაჭრობა. ამასთან, დადგენილია მსგავს ადგილებში ასეთი საქონლის რეალიზაციის წესები. რა თქმა უნდა, მეწარმეებს მოუწევთ გარკვეული სამუშაოების შესრულება და მათი ობიექტების გადახურვა/დახურვა, იმიტომ, რომ დამუშავების, გადამუშავების, სატრანსპორტო საშუალების დატვირთვის დროს, არ ხდებოდეს მსგავსი მასალების ჰაერში გაფრქვევა. მინდა, ვთხოვო ვიცე-მერს, ირაკლი ხმალაძეს და ჩემს მოადგილეს, მაია ბითაძეს, რომ დაიწყონ კომუნიკაცია ყველა იმ მეწარმესთან, ვისაც კი შეეხება ეს შეზღუდვები, იმისთვის, რომ 2021 წლის პირველი იანვრიდან ეს საქმიანობა მოვიყვანოთ ფორმაში და ნაკლებად დავაბინძუროთ გარემო. მივცეთ შესაძლებლობა, მოსახლეობას, რომ ისუნთქონ უკეთესი ჰაერი. მიხედეთ ამ საქმეს, დროულად გადით კონტაქტზე ამ ხალხთან, აუხსენით, გააცანით ყველა ის ინსტრუქცია, რისი დაცვაც მოუწევთ და პირველი იანვრიდან ქალაქში არსებული მავნე პრაქტიკა შევცვალოთ“, - განაცხადა კალაძემ.