ნინო წილოსანი: ყველა რეგულაციის და პირობის გათვალისწინებით, ჩვენ შევძლებთ ქვეყანაში კარგად შენარჩუნებული ეპიდმდგომარეობის ამავე სტატუსით დატოვებას

იმის გათვალისწინებით, რომ სათანადოდ ვაცნობიერებთ ეკონომიკის და ტურისტული სექტორის მოთხოვნებს, საქართველო ამ ეტაპზე ხსნის საზღვრებს ევროკავშირის ხუთ წევრ ქვეყანასთან. პირობები, პრინციპები, რეგულაციები გამომდინარეობს იქედან, რომ მაქსიმალურად იყოს დაცული ჩვენს ქვეყანაში უკვე არსებული სტაბილური ეპიდსიტუაცია თუმცა, ამასთანავე, ვხვდებით რომ მგზავრებს და ტურისტებს სჭირდებათ სათანადო, ასევე, კომფორტული პირობების შექმნა. აღნიშნული ხუთი ქვეყანა შეირჩა სწორედ აქედან გამომდინარე, რომ ამ ქვეყნებში არის კარგი ეპიდსიტუაცია და შესაბამისად, ამ ქვეყნებს გახსნილი აქვს ჩვენთანაც უპირობოდ საზღვრები“, - ამის შესახებ გარემოს დაცვისა და ბუნებრივი რესურსების კომიტეტის თავმჯდომარემ, ნინო წილოსანმა მედიის წარმომადგენლებთან განაცხადა.

მისი განმარტებით, ტურისტების საქართველოში ჰყოფნის პერიოდში სპეციალურად შექმნილი ქოლცენტრი იმოქმედებს, რომელიც ყველა სხვა რეგულაციასთან ერთად, მუდმივ კავშირზე იქნება და მაქსიმალურად გადააზღვევს სხვადასხვა რისკებს. მისივე განცხადებით, ყველა ამ რეგულაციის და პირობების გათვალისწინებით შესაძლებელი იქნება ქვეყანაში კარგად შენარჩუნებული ეპიდმდგომარეობის ამავე სტატუსით დატოვება.

ნინო წილოსანის განმარტებით, მნიშვნელოვანი ინფორმაციაა ის, რომ ეკონომიკის ყველა სხვა დანარჩენი მიმართულების შესანარჩუნებლად ადამიანებს ბიზნეს-ვიზიტებით, მთელი ამ პერიოდის განმავლობაში შეეძლებათ მოგზაურობა თუმცა, ისინი „პისიარ“ ტესტებს ან 14-დღიან კარანტინს თავიანთი ხარჯებით აანაზღაურებენ.

„რაც შეეხება იმას, რომ არიან ადამიანები, რომლებსაც არ მოსწონთ ჩვენი ინიციატივები, რა თქმა უნდა, ამ ალბათობას ვუშვებთ, რომ ყოველთვის იქნებიან ოპოზიციის ის წარმომადგენლები, რომელთათვისაც, რეალურად, არ აქვს მნიშვნელობა ფაქტობრივ გარემოებებს და იმ სტატუსს, რომელშიც ჩვენ ახლა ვიმყოფებით და მიღწევებს, რომელიც ჩვენ გვაქვს. ამიტომ, მათი მხრიდან ბუნებრივია და ლოგიკურია თუმცა, ასევე, ბუნებრივი და ლოგიკური იქნება ის შედეგი, რომელსაც მივიღებთ და ის მოტივაცია, რომელიც ჩვენ გვაქვს - რომ ერთი მხრივ, გავხსნათ ქვეყანა და ხელი შევუწყოთ ეკონომიკისა და ტურიზმის განვითარებას და გარკვეულწილად ახალი შესაძლებლობად გამოვიყენოთ ეს ყველაფერი მეორე მხრივ, კი ეს იყოს ქვეყანაში ჯანმრთელობის და ეპიდსიტუაციის რეგულაციის საშუალება“, - განაცხადა ნინო წილოსანმა.​

საქართველო საზღვარს ამ ეტაპზე გერმანიას, საფრანგეთს, ლატვიას, ლიეტუვასა და ესტონეთს გაუხსნის.