კახა კალაძე: თბილისში ჰაერის დაბინძურების პრობლემას მხოლოდ ტრანსპორტის განახლება ვერ მოაგვარებს

„ჩვენი სატრანპორტო პოლიტიკის ნაწილია საცობებისა და ჰაერის დაბინძურების შემცირება, რაც ქალაქისთვის სერიოზულ პრობლემას წარმოადგენს. ამის მოწესრიგება, რა თქმა უნდა, ტრანსპორტის განახლებით შესაძლებელია, თუმცა, მხოლოდ ეს კომპონენტი ვერ მოაგვარებს არსებულ ეკოლოგიურ მდგომარეობას“, - ამის შესახებ დედაქალაქის მერმა, კახა კალაძემ პრეზენტაციის - „მდგრადი მობილობა თბილისისთვის“ წარდგენისას განაცხადა.

„ჩვენ ღონისძიებების მთელი რიგი გვაქვს დაგეგმილი; ესაა სკვერების, პარკების განახლება-რეაბილიტაცია, ახალი საქალაქო პარკების მშენებლობა, სამშენებლო მიმართულბით რეგულაციების დაწესება, რათა მაქსიმალურად შევინარჩუნოთ და მოვაწესრიგოთ ჰაერის დაბინძურების მიმართულებით არსებული სიტუაცია. ასევე, მნიშვნელოვანია სატრანსპორტო საშუალებათა ახალი იერარქიის ჩამოყალიბება და გადაადგილების მდგრადი საშუალებებისათვის პრიორიტეტების მინიჭება. ყველა ინფრასტრუქტურული პროექტი, რომელის დედაქალაქში ხორციელდება ჩვენ მიერ, ყველგან მაქსიმალურადაა გათვალისწინებული ის რეკომენდაციები, რომელიც ჩვენი უცხოელი ექსპერტების, არასამთავრობო ორგანიზაციების მხრიდან მოდის. ჩვენი სატრანსპორტო პოლიტიკის მთავარი მიმართულება და ერთ-ერთი მნიშვნელოვანი შემადგენილი არის ის, რომ ინფრასტრუქტურული სამუშაოების დროს, პრიორიტეტი უნდა მიენიჭოს საზოგადოებრივ ტრანსპორტს, ფეხით მოსიარულეებს. ამის საუკეთესო მაგალითია ჭავჭავაძის გამზირის რეაბილიტაცია. ყველა სამუშაოს დროს ეს პრიორიტეტები გათვალისწინებულია - რომ საზოგადოებრივი ტრანსპორტი იყოს ყველაზე სწრაფი, მოწესრიგებული და კომფორტული. აღსანიშნავია ინკლუზიური საფეხმავლო ინფრასტრუქტურის, ველოინფრასტრუქტურის მოწყობა და განვითარება. ალბათ, დააკვირდებით, რომ ყველა სამუშაოები, რომელიც საგზაო ინფრასტრუქტურის მოსაწყობად მიმდინარეობს, სადაც არსებული მდგომარეობა იძლევა საშუალებას, ყველგან ვითვალისწინებთ ველობილიკებს და ვაფართოვებთ ტროტუარებს. ჭავჭავაძის გამზირზე ფეხით გავლა შეუძლებელი იყო, სავსე იყო ავტომობილებით. ეს სერიოზულ პრობლემას უქმნიდა ქვეითებს. ეს კატეგორიულად მიუღებელია და ამას ვერ დავუშვებთ. შესაბამისად, ტროტუარები მოწესრიგდება და ავტომობილებისთვის იარსებებს ცალკე სივრცე. აღსანიშნავია ელექტრო და ეკომეგობრული ტრანსპორტის წახალისება და სხვადასხვა სატრანსპორტო საშუალებების განვითარება და ინტეგრაცია საზოგადოებრივ ტრანსპორტთან“, - განაცხადა კახა კალაძემ.