იურისტი თამარ მახარობლიძე: შშმ პირთა უფლებების შესახებ კანონი ადამიანსა და საზოგადოების კეთილდღეობაზე ორიენტირებულ პოლიტიკას უსვამს ხაზს

„შეზღუდული შესაძლებლობის მქონე პირთა უფლებების შესახებ“ კანონი საქართველოს ისტორიაში არის პირველი მცდელობა იმისა, რომ სახელმწიფოში შშმ პირთა უფლებების რეალიზებისთვის კონკრეტული მექანიზმების მქონე კანონმდებლობა არსებობდეს“ - ამის შესახებ იურისტი თამარ მახარობლიძე Facebook-ის საკუთარ გვერდზე წერს.

„საკანონმდებლო აქტი იუსტიციის სამინისტროს თაოსნობითა და სხვა უწყებების ჩართულობით მომზადდა. კანონის პროექტის შემუშავებაში მონაწილეობას იღებდნენ, ასევე, შშმ პირთა ორგანიზაციები, საერთაშორისო დონორები და ექსპერტები. შშმ პირების ინტერესებზე ორიენტირებული სპეციალური კანონი არამარტო ინოვაციურ, არამედ რევოლუციურ კანონს წარმოადგენს. იგი ბევრ სხვადასხვა ასპექტში არის თანამედროვე კანონმდებლობა და შესაბამისობაშია საერთაშორისო სტანდარტებთან. საკანონმდებლო აქტი ნამდვილად უძლებს იმ ტესტს, რომელიც შეზღუდული შესაძლებლობის მქონე პირთა უფლებების კონვენცია აკისრებს სახელმწიფოებს. კანონმა ერთ საკანონმდებლო აქტში გააერთიანა სხვადასხვა უწყებების ვალდებულებები, მოამზადონ დროში გაწერილი სამოქმედო გეგმები კანონის ეფექტური აღსრულებისათვის. აღნიშნული რეფორმა კიდევ ერთხელ უსვამს ხაზს, მთავრობის ადამიანსა და საზოგადოების კეთილდღეობაზე ორიენტირებულ პოლიტიკას“ - წერს იურისტი.

აღნიშნული კანონის პირველადი პროექტი რამდენიმე წლის წინ მოამზადა კოალიციამ „დამოუკიდებელი ცხოვრებისათვის“, რომელიც აერთიანებს 28 არასამთავრობო ორგანიზაციას, მათ შორის, შშმ პირების მიერ დაფუძნებულ არასამთავრობო ორგანიზაციებს.

2017 წელს სამუშაო ჯგუფის იუსტიციის სამინისტროში შექმნის შედეგად, მოცემული პროექტი გადამუშავდა. მასში შეტანილ იქნა დაინტერესებული მხარეების მოსაზრებები და მთავრობის შემადგენლობასთან სიღრმისეული კონსულტაციების შემდეგ, 2020 წლის თებერვალში, რეფორმა მთავრობის საკანონმდებლო ინიციატივის სახით წარედგინა საქართველოს პარლამენტს.

კანონს პირველად შემოაქვს „ქართული ჟესტური ენის“, როგორც საქართველოში მცხოვრებ ყრუ და სმენადაქვეითებულ ადამიანებთან კომუნიკაციის საშუალების, განმარტება და ავალდებულებს სახელმწიფოს, აღიაროს იგი და შექმნას ყველა აუცილებელი წინაპირობა მისი სათანადოდ გამოყენებისათვის იმ პირთა მიერ, ვისაც ამის საჭიროება აქვს; სამთავრობო დონეზე შეიქმნება შეზღუდული შესაძლებლობის მქონე პირთა უფლებების კონვენციის იმპლემენტაციაზე პასუხისმგებელი უწყებათაშორისი საკოორდინაციო კომიტეტი; კანონი ასევე ითვალისწინებს ისეთი ახალი სერვისის შემოტანას, როგორიცაა პერსონალური ასისტენტის მომსახურება. ეს სერვისი მუნიციპალიტეტების მიერ იქნება გაცემული და ხელს შეუწყობს შშმ პირებს დამოუკიდებლად ცხოვრებაში, სერვისის გაცემის დაწყება კი, დამოკიდებული იქნება საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მიერ სერვისის მოცულობის განსაზღვრაზე.