კახა კალაძემ ჭავჭავაძეზე შექმნილი დისკომფორტისთვის მძღოლებს მოუბოდიშა და განმარტა, რომ სატრანსპორტო რეფორმა მსოფლიოს გამოცდილებით ხორციელდება

ჩვენი დამოკიდებულება არ არის, რომ ვებრძვით კერძო ავტომობილებს, პირიქით, სატრანსპორტო პოლიტიკის რეფორმით ყველას თანაბრად გადაუნაწილდება მიმართულებები, - ამის შესახებ დღეს მთავრობის სხდომაზე დედაქალაქის მერმა კახა კალაძემ განაცხადა.

თბილისის მერმა ბოდიში მოუხადა მძღოლებს, რომელთაც ჭავჭავაძის გამზირზე შაბათს გადაადგილებისას პრობლემები შეექმნათ და საცობში იდგნენ, თუმცა მან ასევე ისაუბრა იმ სატრანსპორტო პოლიტიკაზე, რომლის განხორციელებაც საზოგადოებისთვის გარკვეულად მტკივნეულია.

„მინდა ბოდიში მოვუხადო, ყველა იმ ავტომობილის მძღოლს, ვინც კონკრეტულად ამ დღეს ჭავჭავაძის გამზირზე, მის მიმდებარე ქუჩებზე გადადგილდებოდა და მას მოუწია გარკვეული დროით საცობში დგომა. ადამიანურად ნამდვილად მესმის თქვენი. მეც რიგითი მოქალაე ვარ, ვმართავ ავტომობილს და გადავადგილდები ყოველდღიურად ქალაქში. რა თქმა უნდა, თქვენს ადგილზე მეც იგივე განწყობა და დამოკიდებულება მექნებოდა. აბსოლუტურად მესმის თითოეული თქვენგანის და კიდევ ერთხელ, მინდა ბოდიში მოგიხადოთ“, - განაცხადა კალაძემ.

მისივე თქმით, შესაძლოა ვინმესთვის მერის თანამდებობა პრივილეგია იყოს, მისთვის კი დიდი პასუხისმგებლობა და თბილისელებისთვის მსახურებაა.

კალაძის განმარტებით, ხელისუფლებაში მოსვლამდე მისმა გუნდმა განაცხადა, რომ ქალაქში გაატარებდნენ რეფორმებს, რომელიც შესაძლოა მოქალაქეებისთვის მტკივნეული ყოფილიყო. მათი საარჩევნო პროგრამა 7 ძირითად საკითხზე იყო დამყარებული და წარმოადგინეს ხედვა, თუ როგორ შეიძლებოდა ამ პრობლემების მოგვარება. ერთ-ერთი იყო სატრანსპორტო პოლიტიკა, რომელიც უმძიმეს მდგომარეობაში იყო. ამ მიზნით მათ მოიძიეს მსოფლიოში არსებული გამოცდილება და დაუკავშირდნენ ცნობილ კომპანიებს, რომელთა მეშვეობითაც ახორციელებენ რეფორმას.

კალაძის განცხადებით, თბილისში ავტომობილების რიცხვი ყოველწლიურად მზარდია. თუ 2012 წელს დედაქალაქში დაახლოებით 180 ათასამდე ავტომობილი გადაადგილდებოდა, 2020 წელს 600 ათასი ავტომობილი გადაადგილდება. კალაძემ აღნიშნა, რომ გზებს ვერ გააფართოებენ, რადგან ეს თბილისში ავტომობილების რიცხვის ზრდას წაახალისებს.

„რეფორმის შედეგებს დღეს და ხვალ ვერ დავინახავთ, მაგრამ ამ რეფორმების გატარება ჩვენი ქალაქისთვის სასიცოცხლოდ მნიშვნელოვანია. ჩვენი დამოკიდებულება არ არის, რომ ჩვენ ვებრძვით კერძო ავტომობილებს. მეც მყავს ავტომობილი, ჯიპი და თავად გადავადგილდები, მაგრამ ეს არ ნიშნავს, რომ ჩვენ ვებრძვით კერძო ავტომობილის მძღოლებს. პირიქით, ამ რეფორმით, ამ პროექტით ყველას თანაბრად გადაუნაწილდება მიმართულებები. ავტობუსს ექნება შესაბამისი ზოლები და მხოლოდ ჭავჭავაძე არ იქნება. მთელი ქალაქის მასშტაბით მიმდინარეობს კვლევები და პროექტები ყველგან განხორციელდება. შეიძლება ინფრასტრუქტურულად ეს ვერ შევძლოთ, მაგრამ დახაზვითი სამუშოები ყველგან განხორციელდება, რათა ავტობუსებმა უპრობლემოდ შეძლონ გადაადგილება. დღის განმავლობაში ტრანსპორტით დაახლოებით 1,5 მლნ ადამიანი სარგებლობს. ამიტომ გვინდა ეს პრობლმა მოგვარდეს და დროთა განმავლობაში ჩვენც მოვაგვარებთ ამ პრობლემას“, - განაცხადა კახა კალაძემ.