კახა კალაძე: სატრანსპორტო დერეფნების მოწყობას თბილისის მერია კიდევ რამდენიმე ქუჩაზე გეგმავს

შესაძლოა ინფრასტრუქტურულად ქუჩები ისე ვერ მოვაწყოთ, როგორც ჭავჭავაძის გამზირია, არსებული რელობიდან გამომდინარე მთელი რიგი პროექტების განხორციელება გადაგვედო, თუმცა, დახაზვითი სამუშაოები აუცილებლად გაგრძელდება, რათა არსებულ გზებზე საზოგადოებრივი ტრანსპორტით უპრობლემოდ და სწრაფად გადაადგილება შევძლოთ, - ამის შესახებ თბილისის მერმა კახა კალაძემ დედაქალაქის მთავრობის სხდომაზე განაცხადა.

კახა კალაძის თმით, თბილისის სატრანსპორტო პოლიტიკა მათთვის მნიშვნელოვანი საკითხია. კერძოდ, ქალაქში საზოგადოებრივი ტრანსპორტის სწრაფი გადაადგილების უზრუნველყოფა. ამ მიზნით მერია არაერთ პროექტს ახორციელებს.

„ყველამ კარგად იცის, თუ რამდენად მნიშვნელოვანია ჩვენთვის საზოგადოებრივი ტრანსპორტის განახლება და მოწესრიგება. ამ მიმართულებით, დაწყებული გვაქვს არაერთი პროექტის განხორციელება, რომელთა შორის სატრანსპორტო ინფრასტრუქტურის მოწყობა და არსებული ავტოპარკის განახლებაა. ყველაზე მთავარი ავტობუსების სწრაფი გადაადგილებისთვის შესაბამისი დერეფნების მოწყობაა, რამაც საზოგადოებრივი ტრანსპორტის დროში შეუფერხებელი გადაადგილება და მთელი ქალაქის დაფარვა უნდა უზრუნველყოს, რაც იმას ნიშნავს, რომ ყველა უბანს საზოგადოებრივ ტრანსპორტზე, ამ შემთხვევაში, ავტობუსზე, თანაბარი წვდომა უნდა ჰქონდეს“, - განაცხადა კალაძემ.

მისივე თქმით, დღეისათვის მოქალაქეებს გაჩერებებზე ავტობუსში მოსახვედრად დიდი ხნის ლოდინი სჭირდებათ, რაც სერიოზულ დისკომფორტს წარმოადგენს. შესაბამისად, მათი რეფორმის ამოცანაა, ინფრასტრუქტურის განახლებასთან ერთად მოხდეს ავტობუსების პარკის განახლებაც.

„აღნიშნული მიმართულებით მუშაობის მიზანია, ავტობუსმა იმოძრაოს 7-დან 15 წუთში ერთხელ. სამწუხაროდ, დღეს ქალაქში ჯერ კიდევ არსებობს ისეთი უბნები, სადაც ავტობუსი 40 წუთში ერთხელ მოძრაობს, რაც რა თქმა უნდა, ადგილობრივი მოსახლეობისთვის სერიოზულ დისკომფორტს წარმოადგენს. ჩვენი მთავარი მიზანია, რომ ეს ყველაფერი დროულად მოწესრიგდეს და მოქალაქეებს ქალაქში სწრაფი გადაადგილების საშუალება ჰქონდეთ. იცით, რომ დაწყებული გვაქვს ავტობუსების შესყიდვა, რომელიც მოცულობაში იზრდება და მოსახლეობის ორჯერ მეტი რაოდენობის გადაყვანას შევძლებთ. ასევე, ვიწყებთ ქუჩების მოდერნიზებას, იმისთვის, რომ ათი სატრანსპორტო დერეფანი, რომელიც დედაქალაქის ძირითად გამზირებს მოიცავს, მოეწყოს ისე, რომ მათზე 12 და 18-მეტრიანმა ავტობუსებმა შეუფერხებლად, - განაცხადა კალაძემ.

მისივე თქმით, 12 მეტრიანი ავტობუსები მათ შეიძინეს, მომავალ წელს კი 18 მეტრიანი ავტობუსების შეძენა იგეგმება. კალძემ ასევე აღნიშნა, რომ მნიშვნელოვანია „ჭკვიანი შუქნიშნების“ შესყიდვაც.

„ამ მიზნით ტენდერი გამოცხადებული გვაქვს და უახლოეს პერიოდში გვეცოდინება გამარჯვებული კომპანია. ზოგადად, სატრანსპორტო პოლიტიკის საკითხებში ჩართული არიან უცხოელი ექსპერტები და სპეციალისტები, რისთვისაც მათ კიდევ ერთხელ მინდა მადლობა გადავუხადო თანამშრომლობისთვის. ამ ეტაპზე, გადავდივართ სატრანსპორტო დერეფნების მოწყობის საკითხის დეტალურ განხილვაზე. რამდენიმე ქუჩაზე უკვე ზუსტი მოდელირება და სატრანსპორტო სქემები გვაქვს შედგენილი“, - განაცხადა კალაძემ.

მისივე თქმით, უახლოეს პერიოდში ამ საკითხზე მათ პრეზენტაცია ექნებათ.

„შესაძლოა ინფრასტრუქტურულად ქუჩები ისე ვერ მოვაწყოთ, როგორც ჭავჭავაძის გამზირია, არსებული რელობიდან გამომდინარე მთელი რიგი პროექტების განხორციელება გადაგვედო, თუმცა, დახაზვითი სამუშაოები აუცილებლად გაგრძელდება, რათა არსებულ გზებზე საზოგადოებრივი ტრანსპორტით უპრობლემოდ და სწრაფად გადაადგილება შევძლოთ“, - განაცხადა კალაძემ.