თინათინ ბერძენიშვილი ოპოზიციის ინიციატივაზე: ეს აზიანებს მედიაგარემოს და აზარალებს დემოკრატიის მთავარ, ფუნდამენტურ პრინციპებს

საზოგადოებრივი მაუწყებლის ახალი გენერალური დირექტორი ოპოზიციის მოთხოვნას ეხმაურება. თინათინ ბერძენიშვილის თქმით, პოლიტიკოსების ნაწილის ინიციატივა საზმაუს გაუქმების შესახებ, თავისუფალ მედიაზე შეტევაა. ბერძენიშვილი საერთაშორისო ორგანიზაციებსა და საელჩოებს მიმართავს და სთხოვს ამ პროცესს დააკვირდნენ.

„გვაქვს პრეტენზია, რომ არჩევნები გავაშუქოთ მიუკერძოებლად, დაბალანსებულად და პლურალისტურად, რაც მთავარია. ამიტომ, ეს აზიანებს მედიაგარემოს, არა მარტო მედიაგარემოს. ვფიქრობ, რომ აზარალებს დემოკრატიის მთავარ, ფუნდამენტურ პრინციპებს. ძალიან ფრთხილად ვიქნებოდი ამ შემთხვევაში პოლიტიკოსების განცხადებების კომენტირებისასაც და მათ შორის მათაც მოვუწოდებდი თავი შეიკავონ ამ წინასაარჩევნო პერიოდში მსგავსი თავდასხმებისგან. ეს შეიძლება იყოს აღქმული როგორც დამოუკიდებელ მედიაზე თავდასხმა, მათ შორის ჟურნალისტების დაშინება. მინდა ვთხოვო ყველა საერთაშორისო ორგანიზაციას, რომ დააკვირდეს ამ პროცესს. საზოგადოებრივი მაუწყებელი ყველაფერს გააკეთებს იმისთვის, რომ ის იყოს ანგარიშვალდებული არა პოლიტიკოსების, არამედ საზოგადოების წინაშე და ეს ასე იქნება. დაბოლოს, ეს არის ევროპული მოდელი, ეს არის დემოკრატიის ქვაკუთხედი და ამას ყველამ უნდა ვცეთ პატივი“, - განაცხადა ბერძენიშვილმა.

საზოგადოებრივი მაუწყებლის დახურვის სურვილი „ნაციონალური მოძრაობის“ მაჟორიტარობის კანდიდატმა კახა ოქრიაშვილმა გუშინ, ნახიდურში მომხდარი ინციდენტის შემდეგ გააჟღერა. ის პირველი არხის ჟურნალისტის კითხვამ გააღიზიანა, რომელსაც პასუხი არ გასცა და შემდეგ თქვა, რომ საზოგადოებრივი მაუწყებელი უნდა დაიხუროს. მოგვიანებით მისი შეხედულება სხვა ოპოზიციონერებმაც გაიზიარეს.