კახა კალაძე თბილისის ცენტრალურ პარკზე: პროექტის სრულად განხორციელებას დაახლოებით ორი წელი დასჭირდება

რეკრეაციული სივრცეების თვალსაზრისით, ჩვენ ძალიან ცუდი პრაქტიკა გვქონდა და დარწმუნებული ვარ, არც ერთ თბილისელს არ მოსწონდა ის ყველაფერი, რაც გასული წლების განმავლობაში ხდებოდა. ნამდვილად არაა სასიამოვნო, როდესაც რეკრეაციული სივრცეების, სპორტული მოედნებისა და სკვერების ხარჯზე მიმდინარეობდა მშენებლობები. ეს ჩემთვის, როგორც ამ ქალაქში მცხოვრები ადამიანისთვის და, რა თქმა უნდა, როგორც ქალაქის მერისთვის, კატეგორიულად მიუღებელია, - ამის შესახებ თბილისის მერმა, კახა კალაძემ ტელეკომპანია „იმედის“ ეთერში, გადაცემაში „არენა“ განაცხადა.

„ჩემი წინასაარჩევნო კამპანიის დროს, ერთ-ერთი მთავარი დაპირება იყო სწორედ ის, რომ ჩვენ, ერთხელ და სამუდამოდ, წერტილს დავუსვამდით ქალაქში ქაოტურ განაშენიანებას და არც ერთი მშენებლობა არ განხორციელდებოდა რეკრეაციული სივრცეების, სპორტული მოედნების, სკვერებისა და პარკების ხარჯზე. ჩვენ ჩვენს დაპირებას, რა თქმა უნდა, ვასრულებთ. ნამდვილად მეამაყება, როგორც ქალაქის მერს, როგორც ამ ქალაქის მაცხოვრებელს, ის, რომ ქალაქში, ძალიან დიდ ტერიტორიაზე, გაჩნდება ასეთი მაგარი, რეკრეაციული, დასასვენებელი სივრცე, სადაც ყველა თაობის ადამიანისთვის იქნება შესაბამისი ადგილი. დღეს მქონდა სრული პრეზენტაცია, სადაც დეტალურად ვისაუბრეთ, თუ როგორ იქნება დაგეგმილი პარკი, თავისი ზონირებით, გეგმარებით, ბილიკებით, სადაც ყველას ექნება საკუთარი ბილიკი - ფეხით მოსიარულეს, ველომოყვარულს, ელექტროსკუტერების მოყვარულებს. როგორც განვითარებულ ქვეყნებში არსებობს ცენტრალური პარკები, რა თქმა უნდა, ამ პროექტის სახით, ზუსტად, ანალოგი იქნება ჩვენს დედაქალაქშიც. მომდევნო დღეების განმავლობაში გეტყვით ზუსტ თარიღს, თუ როდის დაიწყება უშუალოდ პროექტის განხორციელება. უკვე შერჩეულია კომპანია, რომელიც სამუშაოებს განახორციელებს. დაახლოებით, ორი წელი დასჭირდება პროექტის სრულად განხორციელებას. ჩვენ, ბოლო დროის განმავლობაში, ბევრი კარგი პროექტი განვახორციელეთ, მზიურის, ყოფილი კიკვიძის პარკის სახით... დარწმუნებული ვარ, ეს პროექტი ერთ-ერთი საუკეთესო იქნება ჩვენს ქალაქში“ - განაცხადა დედაქალაქის მერმა.

ყოფილი იპოდრომის ტერიტორიაზე ცენტრალური პარკი გაშენდება. საერთაშორისო საქველმოქმედო ფონდმა „ქართუმ“ თბილისის მუნიციპალიტეტს საკუთრებაში უსასყიდლოდ გადასცა ყოფილი იპოდრომის ტერიტორია, რომელიც კერძო მესაკუთრეებისგან გამოისყიდა.