თედო გორგოძე დავით გარეჯის საქმეზე: ამ რუკის არგამოყენება არ შეიძლებოდა, მე ამას პროფესიულ შეცდომას დავარქმევდი

მე ივერი მელაშვილისა და ნატალია ილიჩოვას ბრალეულობაზე ვერ ვისაუბრებ, მაგრამ შემიძლია ვისაუბრო პროფესიულ გადაცდომაზე. ადამიანურად განვიცდი ივერი მელაშვილისა და ნატალია ილიჩოვას მდგომარეობას, მაგრამ სიმართლე უნდა გაირკვეს, - ამის შესახებ ტელეკომპანია „იმედის“ გადაცემაში „დღის ქრონიკა“ თავდაცვის ძალების გენშტაბის კარტოგრაფია-გეოდეზიის დეპარტამენტის კარტოგრაფიული უზრუნველყოფის სამმართველოს უფროსმა, თედო გორგოძემ განაცხადა.

„კომისიაში მისვლის დღიდან რამდენიმე წლის განმავლობაში ჩვენ, ფაქტობრივად, კომისიის სამუშაო მასალა არ გვინახავს. იყო მხოლოდ რამდენიმე ამონახაზი, რომელიც ჩვენ გაგვაცნეს როგორც კომისიის სახელმძღვანელო მასალა. რაც შეეხება დანარჩენ მასალას, ჩვენ ის კომისიის გარეთ მოვიძიეთ, ანუ შევეცადეთ სრული კარტოგრაფიული და სამართლებრივი სურათი შეგვექმნა საზღვრებთან დაკავშირებით. 2014 წელს ამაში მაშინდელი პრემიერ-მინისტრი ჩაერთო და მისი დავალებით სერიოზული სამუშაო ჩატარდა, მათ შორის იყო მოძიებული ის 1:200 000-იანი რუკა. ეს ჩვენი კომისიის გარეთ ჩატარებული სამუშაოს შემდეგ მოხდა. მე ივერი მელაშვილისა და ნატალია ილიჩოვას ბრალეულობაზე ვერ ვისაუბრებ, მაგრამ შემიძლია ვისაუბრო პროფესიულ გადაცდომაზე. ჩემი აზრით, ივერი მელაშვილი არ არის კარტოგრაფი და არ იცის ეს პროფესია იმ დონეზე, რომ ასეთი მნიშვნელოვანი საკითხი გადაეწყვიტა. ადამიანები, რომლებიც ამ პროფესიაში ათწლეულებია ვართ, კარტოგრაფიული ნაწილის საკუთარ თავზე აღებასაც ვერ გავრისკავთ. კარტოგრაფიული ნაწილის გარდა აქ არის უამრავი იურიდიული დოკუმენტი. ალბათ, ეს გამოძიების დასადგენია. ჩვენ ადამიანურად განვიცდით ამ ორი ადამიანის მდგომარეობას, მაგრამ სიმართლე უნდა გაირკვეს. მე ამას დავარქმევდი პროფესიულ შეცდომას. ამ რუკის არგამოყენება არ შეიძლებოდა“, - განაცხადა გორგოძემ.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა 8 ოქტომბერს შეეფარდათ. საქმეზე წინასასამართლო სხდომა 4 დეკემბერს გაიმართება.