ეკატერინე ტიკარაძე: 19 წლის თეკლას გარდაცვალების მიზეზებზე პასუხი პირველ რიგში მესაჭიროება მე, რომ მსგავსი შემთხვევები აღარ განმეორდეს

ჯანდაცვის მინისტრი ეკატერინე ტიკარაძე 19 წლის თეკლა თორდიას ოჯახს უსამძიმრებს. მისი თქმით, რეგულირების სააგენეტოში შეიქმნა ჯგუფი, რომელმაც მოიძია დოკუმენტაცია და მიმდინარეობს საქმის შესწავლა.

„პირველ რიგში მინდა მივუსამძიმრო თეკლას ოჯახს, მთელს საქართველოს. ნამდვილად ძალიან ტრაგიკული ფაქტი მოხდა და ამას ჯანდაცვის სამინისტროში ყურადღების გარეშე ვერ დავტოვებდით. გუშინ ჩემი დავალებით, მყისიერად, რეგულირების სააგნეტოს მხრიდან შეიქმნა ჯგუფი, რომელმაც მოიძია დოკუმენტაცია და მიმდინარეობს შესწავლა“, - განაცხადა მთავრობის ადმინისტრაციაში, უწყებათაშორისი საკოორდინაციო საბჭოს სხდომის შემდეგ გამართულ ბრიფინგზე ჯანდაცვის მინისტრმა.

ეკატერინე ტიკარაძის თქმით, გაირკვევა თუ რა ხარვეზების გამო დადგა ლეტალური შედეგი და ყველა იმ კითხვას, რომელსაც საზოგადოება ელის, პასუხი გაეცემა.

„გუშინ ჩემი დავალებით, მყისიერად, რეგულირების სააგენტოს მხრიდან შეიქმნა ჯგუფი, რომელმაც მოიძია დოკუმენტაცია და მიმდინარეობს შესწავლა. ისინი ამასთან დაკავშირებით გააკეთებენ განცხადებას, როგორც კი გარკვეული დასკვნები იქნება, თუ რა ხარვეზების გამო დადგა მსგავსი ლეტალური შედეგი. ჩემი უშუალო ხელმძღვანელობით ნამდვილად გაეცემა პასუხი ყველა იმ კითხვას, რომელსაც საზოგადოება ელის და ამ კითხვებზე პასუხი პირველ რიგში მესაჭიროება მე, რომ მსგავსი შემთხვევები აღარ განმეორდეს“, - განაცხადა ჯანდაცვის მინისტრმა.

19 წლის თეკლა გერმანულ ჰოსპიტალში გარდაიცვალა, სადაც აცხადებენ, რომ ინფიცირებული გოგო კოვიდსასტუმროდან უმძიმეს მდგომარეობაში გადაიყვანეს. მას თანმდევი დაავადება დიაბეტი ჰქონდა, რის გამოც ოჯახი მის ჰოსპიტალიზებას ინფექციის დადასტურებისთანავე ითხოვდა.