კახა კალაძე: 2012 წლამდე დაახლოებით 185 ათასი კერძო ავტომობილი გადაადგილდებოდა დედაქალაქში, დღეს კი 650 ათასზე მეტია

2012 წლამდე დაახლოებით 185 ათასი კერძო ავტომობილი გადაადგილდებოდა დედაქალაქში, დღეს გადაადგილდება 650 ათასზე მეტი ავტომობილი და ყოველ წელს 7-8 პროცენტით იზრდებოდა იმპორტირებული ავტომობილების რაოდენობა, - ამის შესახებ თბილისის მერმა კახა კალაძემ „იმედის“ გადაცემა „დედაქალაქში“ განაცხადა.

„აქედან 45 პროცენტი იყო 20 წლის ზემოთ ავტომობილები, ათი წლის ზემოთ ავტომობილები იყო 40 პროცენტი, დანარჩენი სხვადასხვა ასაკის მანქანა, ეს სერიოზული პრობლემაა. მე, იმ ადამიანების მესმის, ვისაც აქვს შესაძლებლობა, რომ 1 500, 2 000 დოლარად შეიძინოს ავტომობილი, იმიტომ რომ ის ერთი ადგილიდან მეორეზე კომფორტულად გადაადგილდეს. საზოგადოებრივი ტრანსპორტის პრიორიტეტი ამ პრობლემას მოაწესრიგებს. ამას რა თქმა უნდა დრო დასჭირდება, უცებ ერთი ხელის მოსმით ვერ გაკეთდება.

ავტობუსების განახლება პირველ პრიორიტეტად დავისახეთ, რომ ადამიანს არ ჰქონდეს სურვილი ერთი ადგილიდან მეორემდე მისვლაში გამოიყენოს ავტომობილი. შემოვიყვანეთ უახლესი ავტობუსები, რომელიც სუფთა, ეკოლოგიურად მოწესრიგებულია და ეს ადამიანებს მიცემს სტიმულს, რომ საზოგადოებრივი ტრანსპორტით იმგზავრონ“, - განაცხადა კახა კალაძემ.