რატომ არის საჭირო „ბასლაინები“ - კახა კალაძის განმარტება

იყო ძალიან ბევრი კრიტიკა იმასთან დაკავშირებით, რომ რად გვინდა ამდენი საავტობუსე ზოლი. ე.წ. „ბასლაინები“. თქვენ როგორ წარმოგიდგენიათ, ამდენი ახალი ავტობუსის შემოყვანა, თუ მათ არ ექნებათ შესაბამისი ზოლები იმისთვის, რომ უპრობლემოდ შეძლონ გადაადგილება. ისინი ისეთივე პრობლემაში აღმოჩნდებიან, როგორც კონკრეტულ ქუჩებზე კერძო ავტომობილები, - ამის შესახებ თბილისის მერმა კახა კალაძემ იმედის გადაცემა „დედაქალაქში“ განაცხადა.

„იქნება საცობში გაჭედილი და ადამიანები, რომლებიც გაჩერებაზე ელოდებიან საზოგადოებრივ ტრანსპორტს, იმის მაგივრად, რომ 2 წუთში მოვიდეს ტრანსპორტი, უწევთ ლოდინი 15-20 წუთი იმიტომ, რომ ავტობუსი გაჭედილია საცობში“, - აღნიშნა დედაქალაქის მერმა.

მისივე თქმით, ხდება ინფრასტრუქტურის მოწესრიგება იმისთვის, რომ ავტობუსებს ჰქონდეთ თავიანთი ზოლები, სადაც უპრობლემოდ და კომფორტულად შეძლებენ გადაადგილებას.

„ეს არის ძალიან მნიშვნელოვანი მიმართულება. ერთ დღეში მენტალილეტი შევიცვალოთ და ის სტერეოტიპები დავამსხვრიოთ, რაც არსებობს, ძალიან რთული იქნება. ამას გარკვეული დრო დასჭირდება და მე ძალიან დიდი იმედი მაქვს, რომ საზოგადოების მხარდაჭერა და თანადგომა იქნება“, - განაცხადა კახა კალაძემ.