საგარეო საქმეთა სამინისტროს პრესსპიკერი: ვიზალიბერალიზაციის გადაწყვეტილებას საქართველოსთვის როგორც პოლიტიკური, ასევე მნიშვნელოვანი პრაქტიკული დანიშნულება ჰქონდა

დღეს ოთხი წელი გავიდა, რაც საქართველომ ევროკავშირის/შენგენის ზონაში, უვიზო მიმოსვლის შესაძლებლობა მოიპოვა. ზოგადად ვიზალიბერალიზაციის გადაწყვეტილებას საქართველოსთვის როგორც პოლიტიკური, ასევე მნიშვნელოვანი პრაქტიკული დანიშნულება ჰქონდა, - ამის შესახებ საგარეო საქმეთა სამინისტროს პრესსპიკერმა, მარი ნარჩემაშვილმა განაცხადა.

მისივე თქმით, აღნიშნული ფაქტი ევროკავშირის პარტნიორების მხრიდან საქართველოს აღიარება.

„დღეს ოთხი წელი გავიდა, რაც საქართველომ ევროკავშირის/შენგენის ზონაში, უვიზო მიმოსვლის შესაძლებლობა მოიპოვა. ზოგადად ვიზალიბერალიზაციის გადაწყვეტილებას საქართველოსთვის როგორც პოლიტიკური, ასევე მნიშვნელოვანი პრაქტიკული დანიშნულება ჰქონდა.

პირველ რიგში ეს გახლდათ ჩვენი ევროკავშირის პარტნიორების მხრიდან საქართველოს აღიარება და აღიარება იმ კომპლექსური რეფორმების, რაც ქვეყანამ იმისთვის გაატარა, რომ საქა რთველოს მოქალაქეებს უვიზო სარგებლობის შესაძლებლობა მოეპოვებინათ. ამ გადაწყვეტილებას ძალიან დიდი პრაქტიკული დატვირთვა ჰქონდა, საქართველოს მოქალაქეებისთვის გაიხსნა ევროკავშირის სივრცე და ამ დროის მონაცემებით ნახევარ მილიონზე მეტმა მოქალაქემ მილიონზე მეტი ვიზიტი განახორციელა ევროკავშირის სივრცეში.

საქართველოს მთავრობამ, როგორც უკვე აღვნიშნე კომპლექსური და რთული გზა განვლო რეფორმების, რომ ეს შესაძლებელი ყოფილიყო ჩვენი თანამოქალაქეებისთვის. ახლაც პარტნიორებთან განვაგრძობთ, რომ არ მოხდეს უვიზო წესების ბოროტად გამოყენება საქართველოს მოქალაქეებისთვის და ის სიკეთე, რომელიც ქვეყანას მოუტანა ვიზალიბერალიზაციამ ბოლომდე შენარჩუნდეს“, - განაცხადა მარი ნარჩემაშვილმა.

დღეს ოთხი წელი შესრულდა, რაც საქართველოს მოქალაქეებს ევროკავშირის ქვეყნებში უვიზოდ მოგზაურობა შეუძლიათ.