ნინუცა მაყაშვილი, რომელიც ბესო ზანგურს ძალადობაში ადანაშაულებს, საგამოძიებო უწყებაში დაიბარეს

მსახიობი ნინუცა მაყაშვილი, რომელიც ყოფილ მეუღლეს, ბესო ზანგურს ძალადობაში ადანაშაულებს, ცოტა ხნის წინ საგამოძიებო უწყებაში დაიბარეს. თუმცა „ქრონიკასთან“ საუბარში მან აღნიშნა, რომ არ სურს თავის ბრალდებებს სამართლებრივი ფორმა მისცეს.

„იყო ძალიან დიდი ზეწოლა: ფსიქოლოგიური, ფიზიკური, მორალური, სულიერი. არ აქვს მნიშვნელობა ორსულად ხარ, ბავშვი გიჭირავს, აჭმევ - არაადეკვატურ ადამიანს არ სჭირდება მიზეზი. მე არ ვაპირებ მის ციხეში ჩაყუდებას, იმიტომ რომ მას ჰყავს პატარა შვილები და ნამდვილად არ მინდა, რომ მისი შვილები ისე გაიზარდონ, როგორც ჩემი შვილი იზრდებოდა. მე მივხვდი, რომ მარტო იმ ქალებისთვის უნდა ამომეღო ხმა, ვინც ახლა მსგავს სიტუაციაშია“, - ამბობს მაყაშვილი.

ბესო ზანგური კი ბრალდებებს უარყოფს.

„არც ნინუცამდე მეუღლე აფიქსირებს იმას, რომ მე ვარ მოძალადე, მიუხედავად იმისა, რომ მას ცოტა სკანდალურად დავშორდი. არ არსებობს, რომ არ ამოვატრიალო ეს, ეს კარგად დაიმახსოვრონ და არ არსებობს, რომ გავაკეთო ისე, რომ კოჭლი ცხვარი წინ დავაყენო. თუნდაც რუსთაველის თეატრში, თუნდაც იმ ცხოვრებაში, რომელსაც ბესო ზანგურის ცხოვრება ჰქვია. მე ვიცი ჩემი წითელი ხაზები“, - ამბობს ზანგური.